Accessibility links

чәршәмбе, 7 декабрь 2016, Казан вакыты 11:36

Башкорт корылтае оештырган форум җәнҗал белән тәмамланды


“Башкорт халкы Русиянең чәчкә атуы өчен” исемле форумда катнашучылар чараның сайлауалды форматында үтүенә зарланды.

Башкортстанның Сибай шәһәрендә “Башкорт халкы Русиянең чәчкә атуы өчен” исемле форум җәнҗал белән тәмамланды. Анда катнашучылар фикеренчә, форум сайлауалды форматында үтте. Чарага казнадан бүленгән акчалар башкорт халкының хәлен тикшерүгә түгел, ә “Бердәм Русия” фиркасенең һәм аның намзәте Зариф Байгускаровны данлау өчен тотылган дип зарланды форумда катнашучылар.

Форумда Дөнья башкортлары корылтае башкарма комитеты рәисе Әмир Ишемгулов чыгыш ясаганнан соң сүз Зариф Байгускаровка бирелде. Башкорт җәмәгатьчелеге Корылтай ни өчен башка фиркаләргә дә сүз бирми, аларның арасында да милләте башкорт булганнар – Раил Сарбаев, Юнир Котлыгужин кебекләр бар бит, кайда тигезлек дигән сораулар яудыра башлады.

Чарада яшьләр сүз сорагач, Корылтай кешеләре аларны тыеп урыннарына утыртып куя. Янәсе сезнең үз форумыгыз булачак, шунда күпме телисез, шул кадәр чыгыш ясарсыз.

Форум азагында Дөнья башкортлары корылтае рәисе чарада җыелганнарны киләсе сайлауда “Бердәм Русия” өчен тавыш бирергә чакырды. Ә Сибай университеты ректоры Зиннур Ярмөхәммәтовның “Бердәм Русия”ле намзәт Зариф Байгускаров өчен тавыш бирү кирәк, дигән чыгышыннан соң залда тавыш купты. Күпләр ни өчен безне Байгускаровны яклап тавыш бирергә өндиләр дигән сорау бирә башлады.

Башкорт җәмәгатьчелеге Дөнья башкортлары Корылтаена артык зур өметләр багламаска, аның халык үсешен тоткарлап торучы оешма булуын танырга чакыра. Башкорт корылтае башкарма комитеты исә бу хәлләргә үзенчә аңлатма бирде. “Чараны үз максатында файдаланырга теләгән бер төркем яшьләр форумны өзәргә тырышты”, диелә Корылтай хәбәрендә.

XS
SM
MD
LG