Accessibility links

шимбә, 3 декабрь 2016, Казан вакыты 01:23

2005 yılda üterelgän jurnalistlar turında


Jurnalistlarnı Yaqlau Komitetı Sişämbedä 2005-nçe yılda üterelgän jurnalistlar turındağı raportın iğlan itte. Raportqa qarağanda uzğan yılda dönyada 47 jurnalist üterelgän. Ä inde Çiklär tanımağan jurnalistlar digän başqa ber törkem bügen iğlan itkän raportında uzğan yılda 63 jurnalist üterelde digän näticägä kilgän.

Jurnalistlarnı yaqlau komitetınıñ raportına qarağanda, 2005-nçe yılda üterelgän 47 jurnalistnıñ dürttän öç öleşe tänqitle qararşları yäisä yazğan maqäläläre säbäple, alarnı endäştermäv maqsatı belän yuq itelgän. Uzğan yılda jurnalistlar öçen iñ qurqınıçlı il Ğıraq bulğan. Anda 22 jurnalist üterelgän. İkençe urında Filipin tora. Anda dürt jurnalist üterelgän. Liviä, Rusiä, Bangladeş, Pakistan, Sri Lanka häm Somaliädä uzğan yılda ikeşär jurnalist üterelgän. Jurnalistlarnı yaqlau komitetınıñ başqarma direktorı Ann Cooperneñ süzlärençä, küpkenä junalistlar üzläreneñ vazıyfaların başqargannarı öçen tormışların yuğaltqannar häm monıñ öçen cavaplılıq xise bulmağan xökümätlär cavaplı. Ä inde Çiklär tanımağan Jurnalistlar oyışmasınıñ bügen iğlan itelgän xisabına qarağanda, 2005-nçe yılda üterelgän jurnalistlarnıñ sanı tağı da küberäk, ul 63. Annan başqa 807 jurnalist qulğa alınğan , 1308enä höcüm bulğan , 1006 media basması senzuralanğan. Ğıraqta 24 jurnalistnıñ kübese terror aktları häm fetnäçe törkemnärneñ höcümnäre näticäsendä hälak bulğan. Öçesendä AQŞ köçläreneñ dä qatnaşı bar. Filipingä kilgändä, anda jurnalistlarnıñ hälak buluına, qorallı törkemnär tügel, ä säyäsmännär, eşquarlar häm narkotik maddälär belän sävdä itüçelär cavaplı. Jurnalizm qurqınıçlı professiälärneñ berse bulıp qala birä.

Färit İdelle, Praga.
XS
SM
MD
LG