Accessibility links

якшәмбе, 11 декабрь 2016, Казан вакыты 07:23

Tatar cırçısı waqıtsız dönyadan kitte


Nuriäxmät Möxämmätcanov Quqmara rayonı Aqsıbı awılında tua. Musa Cälil premiäse laureatı, Smolenskiyda ütkän “Ğolosa Rossii” digän cır konkursında altın medal'gä layıq bula. Tatar cırçıları arasında xalıq cırın böten Rusiä külämenä çığaruçı bularaq ta bilgele ul. Soñğı arada başqa estrada cırçıları kebek üze öçen üze cawaplı bulğan. “Bolğar” ansambleneñ solistı bularaq tanılu ala. Ul çorda Nuriäxmät Möxämmätcanovnıñ älege ansambl'dä cırlawı häm “Ex almağaçları” cırın estrada däräcäsenä kütärüe zur yañalıqqa äylänä. Tanılğan xalıq cırçısı Xämdünä Timerğäliewa belän xezmättäşlek itkän cırçı. Telejurnalist Nailä Yäxinä dä Nuriäxmät Möxämmätcanov turında tapşırular äzerlägän bulğan. Cırçı belän yaqınnan tanışa icatın küzätä. Keşe bularaq ta, cırçı bularaq ta anı yaqın itä. 42 yäşendä waqıtsız dönyadan kitkän cırçı turında Nailä Yäxinä menä närsä äytte: - Bik keşelekle, ğadi küñelle. Yaña yıl kiçendä dä barlıq tanışlarına kerep hämmäsen qotlap, cırlap yörgän. Ul üze dä ğadi keşelärne yarata ide. Ğailä xälenä kilgändä, xäzerge waqıtta anıñ 11-12 yäşlek qızı üsep kilä. Yaña yıl tönendä ul Xämdünä Timerğäliewanı da qotlarğa ölgerä. Bu xaqta Nailä xanım da iskärtep ütte: - Xämdünä Timerğäliewanı da yaña yıldan soñ, säğät berlärdä kilep qotlap çıqqan ul. Xämdünä xanım aña monda ğına qal dip äytkän bulğan, läkin ul barıber kitep barğan. Waqıtsız dönyadan kitkänen belgäç Nailä xanımda aptıraşta qala: - Anıñ üleme… Dusları aña qul kütärmägänder inde dip uylıybız inde. Nuräxmät şikelle eçkersez küñelle keşegä dusları arasınnan naçarlıq etläwçe bulmağandır dip ışanası kilä. Ul Qazannıñ Mäületov uramında tulay toraqta torğan. Anı iske yıldan yaña yılğa küçkän tönne öyenä kergändä sağalap toralar. Häm işegen açıp kergän waqıtta artınnan bärep kerep mendär belän tomalap küp tapqırlar utyuq belän başına suğalar. Şunnan yawız bändälär qimmätle kostyumnarın, stenada elenep torğan suvenirlarnı häm tağın qulğa närsä elägä şunı eläkterep çığıp kitälär. Üterüçelärne kürşelär dä kürep qala. Cırçı yanına kürşeläre yögerep kergändä yöze, gäwdäse tanımaslıq xäldä bula. Niçäder minut ülem belän köräşkännän soñ aşığıç yärdäm maşinasında yaqtı dönya belän xuşlaşa. Şuşı salqın tönnärdä anıñ başqaruındağı “Ex almağaçları” cırın tıñlağanda, cırçı isän häm änä ul radiodan xalıq öçen cırlarğa, aña xezmät itärgä aşqına kebek toyıla… Röstäm İsxaqi

XS
SM
MD
LG