Accessibility links

җомга, 9 декабрь 2016, Казан вакыты 14:46

Omski yağında Yana yıl çaraları


Yaña yılğa bağışlanğan çaralar Omskida ğädättägeçä bixisap buldı. Bıyıl da balalar öçen Gubernator çırşısı, hönärilär berlekläre çırşıları oyıştırıldı, barlıq mädäniät saraylarında yaña yılğa bağışlanğan konsert-kiçälär ütte. Bäyrämnärneñ qayberlärendä tatar balaları da qatnaştı. Döres, çaqıru biletları isäple genä buldı, gubernator çırşısına - 2 şähärneñ töp çırşısına - 9 ğına bala çaqırıldı. Tatar oyışmaları üzläre dä şuşı könnärdä balalar öçen çırşı bäyräme ütkärergä cıyınalar. Ximayäçe birgän 3 meñ rubl' aqçağa tatlı büläklär satıp alıp, tatar milli-mädäni möxtäriäte urnaşqan binada bäyräm kiçäse oyıştırırğa äzerlänälär. Tatar yäşläre dä iğtibarsız qalmadı - “Fäniä” studiäseneñ häm “Tanışu” klubınıñ yaña yılğa bağışlağan kiçäläre dekaber axırında uq ütte.

Ölkäneñ awıl rayonnarında da yaña yılğa bağışlanğan kiçälär oyıştırıldı. Soñğı yıllarda Omski yağındağı tatar awıllarında ber kürkäm ğädät ğämälgä kerep kilä - 31 dekaber kiçendä xalıq çırşı bäyrämenä klubqa cıyıla. Anda çittän qarap toruçılar bulmıy diärgä mömkin, barsı da uyınnarda qatnaşa, cırlap-biep küñel aça. Döres, yaña yılnı qarşılarğa xalıq öylärenä tarala.

Şundıy yaña yıl qarşılaw bäyräme bıyıl Bo'şereç'ye rayon üzägendä dä oyıştırıldı. Tatar xäräkäte aktivistları “Bolğar” ansamble sänğätkärläre belän berlektä “Qoqadu” dip isemlängän kafeda çırşı bäyräme oyıştırdılar. Anda 70 tän artıq keşe qatnaştı. Qunaqlar yaqın-tirä awıllardan häm Omskidan da buldılar. Kiçä küñelle ütte, bitaraf utırğan ber genä keşe dä bulmağandır, barsı da törle uyınnarda qatnaştı, cırladı, biede, ğomumän, küñel açtı. Oyıştıruçılar da, qunaqlar da bäyrämnän qänäğät qaldılar. “Mondıy kiçälärne yışraq oyıştırsağız ide”, - dide barsı da.

Omskinıñ “Qızıl Gvardiä” mädäniät sarayı qarşında eşläwçe “Umırzaya” ansamble sänğätkärläre dä, ozaqqa suzılğan yal könnärennän faydalanıp, Muromsevo rayonına konsertlar belän barıp qaytırğa äzerlänälär. Aldağı şimbä-yakşämbe könnärendä alar älege rayonnıñ tatarlar tuplanıp yäşägän Ğuzeneva, İnsäs häm Çertalı awıllarında çığış yasayaçaqlar.

Saniä Mirxaleewa, Omski

XS
SM
MD
LG