Accessibility links

якшәмбе, 11 декабрь 2016, Казан вакыты 10:54

Tatar oyışmaları wäkilläre kiñäş qordı


Respublikada ber bäyräm ikençesenä totaşıp kitkän yaña yıl tantanaları häm yal könnäre däwam itsä dä, Başqortstan tatar milli oyışmaları wäkilläre, alda torğan zur eşlärne iskä töşerep, bıyılğı berençe kiñäşmälärenä cıyıldı. Atnakiç ütkän bu utırışta süz nigezdä ğinwar azağında Ufada cıyılaçaq kiñäytelgän kiñäşmä turında bardı. Anda Başqortstan tatar milli oyışmaları citäkçeläre häm cegärle eşläwçe äğzaları üzläreneñ aldağı yartı yılğa eş plannarın tikşerergä tieş.

Utırışta çığış yasağan Başqortstan Tatar milli-mädäni moxtariäte räise urınbasarı, professor Mäcit Xucin alda torğan töp burıçlarğa tuqtaldı. “Ul burıçlarnı tormışqa aşıru buyınça här oyışma citäkçeläre ğinwar azağında ütäçäk berlektäge cıyınğa qädär üz eş plannarı ölgelären äzerläp betärgä tieş, - dip belderde Mäcit äfände. – Törle säbäplär belän uzğan yılda bilgelägän baytaq qına eşlär ütälmi qaldı. Şuña kürä bıyıl ozaq selkenmiçä genä eşkä totınu xäyerle”.

Mäcit Xucin älege cıyında Ufada tatar gimnaziäsen tözü mäs’äläsenä dä tuqtaldı. Mäğlüm bulğança, Başqortstan Tatar milli-mädäni moxtariäte räise Rämil Bignov dekaber axırında tatar oyışmalarınıñ Ufada ütkän berlektäge kiñäşmäsendä üze tözetä başlağan ber zur ğına binanı tatar gimnaziäse itep tözep beterü öçen tapşıraçağın äytkän ide. Bu täqdimne barlıq oyışmalar da ruxlanıp qarşı aldı. Mäcit Xucin ğinwar urtasınnan uq bu gimnaziä tözeleşeneñ tulı quätenä däwam itäçägen belderde. Äle anda tözeleş kiräk-yaraqları kiterelä. Tatar gimnaziäse 2007 yılnıñ 1 sentäberenä tözelep betärgä tieş.

Tatar milli xäräkäte aktivistlarınıñ berse, professor Marat Ramazanov isä tözeleş eşläre belän berrättän bu gimnaziäneñ uqıtuçıların häm tärbiäçelären tuplıy başlaw xästärlegen kürergä dä çaqırdı. “Köne kilep citkäç kenä tatar gimnaziäse öçen kiräk qädär uqıtuçılar tabıp betüe ansat eş bulmayaçaq, şuña kürä bu mäs’äläne bergäläp bügennän ük xäl itä başlaw xäyerle”, - dip belderde Marat äfände.

Utırışta ağımdağı başqa mäs''älälär buyınça da fiker alıştılar häm ğinwar azağında ütäçäk kiñäytelgän cıyınğa qädär eş plannarın äzerläp betärgä kileştelär.

XS
SM
MD
LG