Accessibility links

Кайнар хәбәр

Qorban ğäyetenä äzerlek bara


Başqortstanda pravoslav xristiannar üz bäyrämnären başlap cibärsä, İslam dinen totuçılar da üzläreneñ iñ zur bäyrämnäreneñ berse – Qorban ğayıten zurlap bilgeläw öçen soñğı äzerleklär alıp bara. Başqortstan Qorban bäyräm uñayınnan töp tantanalar, ğibädät qılular 10 ğinwar könne başlana. İrtänge namazlarnı uqıp, bäyräm wäğäzlären tıñlağannan soñ, küp urınnarda Allahı rizalığı öçen qorbanlıq mal çalularğa kereşäçäklär. Soñğı yıllarda ata-babaları, yaqın tuğannarı ruxına bağışlap, Xoday rizalığı xaqına qorban çaldıruçılar sanı bermä-ber arttı.

Bıyıl Ufa mäçetläre häm diniä näzaratları ixatalarında tağın da yözlärçä sarıq häm sıyır malı qorban kitereläçäk. Misal öçen, “İxlas” mäçete işegaldında maxsus äzerlängän urınnarda din qärdäşlärebez yıl sayın ike yözdän artıq sarıq çaldıra. Comğa könne bu mäçettä mötäwälliät äğzalarınıñ Qorban bäyrämgä soñğı äzerleklärne tikşergän cıyılışı bulıp ütte. Mäçetneñ tınğı belmäs, därmanlı imam-xatibı Möxämmät xäzrät Ğalläm äytüençä, bıyıl da “İxlas” mäçete yärdäme belän, qorban çaldıru öçen 200 dän kübräk keşe möräcäğät itkän. Mallarnı törle rayonnardan kiterälär. Alarnı yaxşılap tärbiälilär häm Ufağa kitergändä dä bik saqlıq belän genä alıp kilälär.

Möxämmät Ğalläm: - Bezneñ “İxlas” mäçete yılnıñ-yılı Qorban bäyrämne zurlap bilgeli. Küp xalıq yöri bezgä. Alarnıñ xälleläre bäyräm uñayınnan Qorbanlıq mal kitertü öçen aldan uq möräcäğät itep, aqçaların tüläp quya. Bıyıl da 200 dän artıq din qärdäşebez Qorban ğayıtenä sarıqlar häm dürt sıyır malı kitertä. Qısqası, “İxlas” mäçete xäzer bezneñ Ufada qorban çaldıru buyınça töp üzäkkä äylänä bara disäñ dä bula. Xätta Amerika Quşma Ştatlarında häm Yevropa illärendä yäşäwçe millättäşlärebez dä qorbanlıq mal öçen näq menä bezgä möräcäğät itä. Bıltır San-Fransiskoda yäşäwçe millättäşebez Orqıya apa Safa xätta üze Ufağa kilep, şuşı igelekle eşne eşläde. Bıyıl da qorbanlıqqa 4 sarıq çaldıruıbıznı sorap, aqçaların tüläp quydı ul.

Bıyıl bezneñ “İxlas” mäçete öçen tağın ber küñelle üzgäreş başlanmaqçı. Mäçetebezne yañartıp qoru, aña manaralar urnaştıru maqsatında, bez Xoday yortıbıznıñ yaña proyektın eşlätep aldıq. Anı Qazannıñ bilgele arxitektorı eşläde. Xäzer bez bu proyektnı Başqortstan Xökümäte qaramağına tapşırabız. Bu zur eşne atqarıp çığuğa Başqortstannıñ Rusiägä quşıluına 450 yıl tulunı bäyräm itügä bülenäse aqçalardan bezneñ mäçetne maturlawğa da finanslar bireler dip ömetlänäbez.

“İxlas” mäçete imam-xatibı Möxämmät xäzrät Ğalläm süzlärençä, xäzer Başqortstan möselmannarı üzläreneñ İzge Xac säfärenä kitkän qärdäşläreneñ tuğan yaqlarğa isän-saw äylänep qaytuları öçen gel doğa qılıp toraçaq. “Atnakiç könne Mäkkä şähärendä bulğan faciğädä Başqortstan belän Tatarstannan kitkän din qärdäşlärneñ bulmawı xäbär itelgäç bik şatlandıq”, - di Möxämmät xäzrät.

“İxlas” mäçete yärdäme belän bıyıl izge Xac säfärenä 45 keşe kitkän. Ä Başqortstannan barlığı 200dän kübräk din qärdäşlär şuşı tarixi säfärdä qatnaşa. Xacilar Ufağa ike törkem bulıp 17-19 ğinwar könnärendä qaytaçaq.

XS
SM
MD
LG