Accessibility links

пәнҗешәмбе, 8 декабрь 2016, Казан вакыты 19:01

Qazanda Qorban sarığı küpme tora?


Çınlap ta, şaqtıy ozaqqa suzılğan Rusiäneñ maxmır yalların möselmannar tögälläp quya. Aynıq bäyräm belän. Qorban bäyräme yılğa ber tapqır ğına ütä häm olılap qarşı alına. Böten şähär häm awıllarda xalıq munçasın yağa, öyen cıya, qunaq rizıqları peşerä. Ä mäçet tiräsendä şaw –şu. Bu matur şaw-şu, küñelne kütärä torğanı. Mäsälän, Qazannıñ Märcäni mäçete, ike yıl buyına tözekländerü eşläre barğannan soñ, 10 ğinwarda Ğäyet namazına möselmannar qabul itä. Döres, tözekländerü barğanda da namazlar tuqtalmadı mäçettä. Läkin, 200 yıllıq tarixı bulğan, bu olı mäçet bu ğäyeten yaña töşkän kilen kebek, bik matur räweştä qarşı ala. Mäçet yäşärgän, tözekländerelgän. Xalıq ta mäçetkä ağıla. Minut sayın telefon şaltırıy. Saqta toruçılar, xalıqnıñ bäyräm uñayınnan tuğan sorawlarına cawap birep tora. Kemne ğäyet niçädä başlanğanı borçıy. Kemneder Qorbannı qayda çalası, qayan sarığın tabası. Ä Nuraniä apa bik küplär kebek mäçetkä üze kilgän.

Menä üzemneñ häm kürşeläremneñ ğäyet sädaqäsen alıp kildem. Yıl sayın monda kilergä tırışam. Ğäyetkä äzerlänäm inde. İrtägä balalarımnı qunaqqa çaqırdım. Alar eştän soñ, qunaqqa kilerlär, qoymaqlar peşerep toram

Mäçet tiräsendä çınlap torıp sarıq bazarı açılğan. Yılda, Qazandağı mäçetlär qarşına olaw-olaw sarıq kiterelä. Xalıq Qorban sarıqların, mäçet yanına kilep satıp ala. Telägän keşegä monda uq qorbannı çalıp birü dä qaralağan. Cantahir abıy inde niçä yıl qorbanlıq sarıqlar alıp kilep sata ikän

Sarıqlarnı 2500 -5000 sumnan satabız. Yıl sayın kiläbez bez monda satırğa. Xalıq yıldan-yıl kübräk ala. Üzebez üstermibez sarıqların, ä satıp alabız da, ike ay aşatabız. Menä 20 sarıq alıp kilgän idem, inde 3 kenä qaldı. Minem üzem Layış rayonı Olı Yılğa awılınnan

Äytelgänçä, Märcäni mäçete yañarıp, tözekländerelgän kileş, Ğäyetkä äzerlänä. Anda, mikrofonnarnı köylilär, idännärenä kelämnär cäyälär, kilgän-kitkännärne qabul itep-ozatıp toralar. Mäçetneñ yäş imamı Almaz xäzrättä ber tik tormıy. Xalıq soraularına cawap birä, sädaqälär öçen doğa qılıp tora

Аудіо (Doğa uqıy)

Almaz xäzrät, Azatlıqqa bäyrämgä äzerlek barışı turında da söyläde.

Bügennän ük inde küp keşe mäçetkä kilä, doğa qıldırırğa, sädaqälär birergä. Allağa şöker, xalıq mäçetkä kübräk kilä başladı. Bu yal könnäre bulu säbäple dä xalıq ağıla disäk tä bula. Bezneñ mäçettä ike yıldan artıq remont eşläre bara ide. Menä remontnıñ ber öleşe tämamlanıp, ğäyet uqırğa äzer xälgä citte. Bu ğäyetkä işek alları da kiñäytelde. Kemnärder uramda elek namaz uqığan bulsalar, xäzer yortta uqıp bula. Tögäl äytep bulmıy, yaqınça ğayıt namazına Märcäni mäçetenä 5 meñ keşe kilä. Bıyıl, mäçet üze sarıqlar satunı oyıştırmadı. Süze küp buldı başqa yıllarda. Läkin, uramda sarıq satular xäzerdän ük bara. Qorban çalır öçen mömkinleklär, çaluçılar äzerlädek. Ğayıt namazı üze irtänge sigezdä başlanaçaq

Märcäni mäçete imamı Almaz xäzrät buldı. Qazannıñ illegä yaqın barlıq mäçetlärendä dä 10 ğinwar irtäsendä ğäyet namazı uqılaçaq. Tatarstan möftie Ğosman İsxaqi isä, bäyräm namazın Qazan Kirmänendäge Qol Şärif mäçetendä uzdıraçaq.

Räfis Cämdixan

XS
SM
MD
LG