Accessibility links

якшәмбе, 11 декабрь 2016, Казан вакыты 15:06

Törkiädä qoş kizüe tarala


Törkiädä qoş kizüen yoqtırğan keşelär sanı arta baruı böten Yevropanı borçuğa saldı. Törkiä Sälämätlek Saqlaw ministrı Recep Akdağ, tağın 14 awıru keşe buluı açıqlandı, dip belderde. Kizü oçraqları könyaqkönçığışta, Änkara tiräsendäge üzäk töbäktä häm tönyaqtağı Qara diñgez buyında tabılğan. Dönya Sälämätlek Oyışması älegä alarnıñ 4sendä genä çınnan da qoş kizüe bulğanın rasladı. İstanbul şähär başlığı Muammär Güler, 23 keşe qoş kizüe yoqtıruda şiklänelep xastaxanägä salındı, dip belderde. Yevropa komissiäseneñ matbuğat wäkile Michael Mann, jurnalistlarğa, sişämbe könne Törkiä belän çiktäş 6 ildän qoş mamığı kertüne tıyu turında qarar bulaçaq, dip belderde:

"Komissiä, Azärbajcan, Ärmänstan, Görcistan, Süriä, İran häm Ğiraqtan qoş mamığın kertüne tıyu turında qarar äzerli, ul zur ixtimal belän irtägä iğlan iteläçäk. Bu – H5N1 virusı tabılğan Törkiäneñ kürşeläre."

Yevropa Berlege Törkiädän tere qoş häm qoş ite kertüne tıyğan ide inde. Uzğan atnada 3 bala ülgän Van ölkäsendä sälämätlek saqlaw ministrı xalıqnıñ qoşlar yanına yaqın kilmäskä çaqırdı. Rusiäneñ baş sanitar tabibı Gennady Oniçenko, sälämätlek saqlaw räsmiläre qoş kizüeneñ Rusiägä ütep kerüen buldırmas öçen Törkiä, Görcistan häm Azärbajcan belän çik buylarında östämä kontrol çaraların buldırdı, dip belderde. Exo Moskvı radiosına, Oniçenko, möselmannarnıñ Mäkkägä Hac ğämäle, qurqınıç virusnıñ tiz taraluına yul aça ala, dip belderde.

XS
SM
MD
LG