Taciqstan prezidentı Emomali Raxmonov, 3 taciq räsmienä yäkşämbe könne invalid balalar yäşägän yätimnär yortında çıqqan yanğınnıñ tiz arada sünderelmäwe öçen şeltä belderde. Alar – xezmät häm sotsial eşlär ministrı Zokir Vazirov, sotsial mäsälälär öçen cawaplı vise-premyer Xeirinessa Mavlanova häm prezident xakimiäteneñ sotsial xezmät başlığı Boboxon Mahmadov. Alarğa qarşı cinäyät eşe açılu turında xäbär itelmi. Mäğlüm bulğança kiçä yanğında 13 bala häläk buldı. Yätimnär yortınıñ xucalıq eşläre başlığı İlhom Aşurovqa qarşı cinäyät eşe açılğan. Aña, yanğın çıqqaç 1 säğätkä yaqın yanğın sünderüçelär belän bäyläneşkä kermäwdä ğäyepläw belderelgän. Eçke eşlär ministrı Xumdin Şäripov, uzğan yılnıñ martınnan birle yätimnär yortı citäkçelegenä yanğın çığu qurqınıçı turında 12 kisätü cibärelde, dip belderde. Balalar yortı citäkçese Sadullo Yatimov, xezmätkärlär yanğınnı kürgäç tä yanğın sünderü xezmätenä şaltratqannar, dip xäbär itte.
