Accessibility links

дүшәмбе, 5 декабрь 2016, Казан вакыты 01:22

Omskida qorban ğäyete


Qorban bäyräme könne Omskida hawanıñ suıqlığı 35 gradustan tübän buluğa qaramastan, şähärneñ 5 mäçetenä dä xalıq ğayıt namazına küpläp cıyıldı. Cämiğ mäçetendä, mäsälän, öç, “Xäyer-İxsan”da meñ yarım , “İman” “Xaci-Äxmät”, “Säyet-xaci”mäçetlärendä 1-är meñgä yaqın möselman buldı. Ğädättägeçä mäçetlärneñ barsında da bäyräm wäğäzläre söylände, namazlar uqıldı. Bıyıl şunsı da üzençälekle buldı, cämiğ mäçetendä wäğäz başlanır aldınnan Seber yağı möselmannarı möftiäte möftie Zölkärnäy xäzrät Şakircanov uzğan yılda başqarılğan eşlärgä qısqaça yomğaq yasadı, xalıqnı mäçetneñ finans xäle belän tanıştırdı. Möfti-xäzrät süzlärençä, 2005 yılda cämiğ mäçeteneñ kereme 1 mln 530 meñ 586 rubl', ä çığımı 1 mln 542 meñ 912 rubl' täşkil itkän. Bu summa ut, su, cılılıq, salımnar tüläwgä häm mäçetne tözekländerügä totılğan. Uzğan yılda ğına mäçetneñ 99 täräzäse häm 37 işege alıştırılğan. Şunsı mäğnäle buldı, Zölqarnäy xäzrät mäçet täräzäläreneñ sanınıñ xodaynıñ isemnäre belän tigez buluına küptän tügel iğtibar itülären assızıqlap ütte.

Cämiğ mäçetendä möselmannarnı räsmi dairälärdän Däwlät Duması deputatı Oleg Smolin qotladı. Oleg Smolin, möselman ömmätennän bulmasa da, mäçettä canına ruxi çistalıq, paklek aluı turında belderde.

Wäğäzlär söylänep, namazlar uqılğannan soñ, mäçetlär yanındağı maxsus bilgelängän urınnarda qorbannar çalındı, moxtaclarğa qorban itläre taratıldı. Kiçen Cämiğ mäçetendä bäyräm aşı äzerlände. Anda mäçetkä yärdäm kürsätep toruçı iğänäçelär, qayber wazifalı keşelär, aqsaqallar çaqırıldı.

Tağı ber mäğlümat – Omski möselmannarına Krasnoyar kraenıñ Noril'ski şähäre tatar-başqort üzägennän täbrikläw xatı kilde. Anda Qorban bäyräme belän täbriklämäwdän tış qısqaça ğına Noril'skida bäyrämneñ niçek ütüe turında da yazılğan. Bäyrämeneñ berençe märtäbä küptän tügel genä tözekländerelgän “Nurqamal” mäçetendä küp sanlı möselmannar qatnaşında ütüe xaqında beldergän. Ä mäçetne tözekländerü, yaqın-tirädäge territoriäne tärtipkä kiterü eşlären tulısınça şähär xakimiäte başqarğan. Noril'ski eşmäkäre Radik äfände Axmätovnıñ mäçetkä häm krayda näşer itelä torğan “Nur” gäzitenä härdaim yärdäm kürsätep toruı turında da belderelgän. Qorban bäyräme uñayınnan mäçettä aş östäle äzerläwdä dä Radik äfändeneñ yärdäme zur bulğan.

Rozaliä Sayganova, Omski

XS
SM
MD
LG