Accessibility links

шимбә, 3 декабрь 2016, Казан вакыты 18:41

Tatarstan xacilarına qoş kizüe yanıymı?


Törkiädä qoş kizüe oçraqları tabılu, Tatartsandağı xalıqnı da tınıç qaldırmadı. Çönki, bu ilgä respublika keşeläre yış bara. Atnasına ike tapqır oçqıçlar oça. Qoş kizüe alar arqılı respublikağa da citmäsem, menä ber säbäp tınğısızlıqqa. İkençese, respublika xacilarınıñ ber törkeme Törkiä aşa watanğa yul tota. Alarnıñ xäle niçek?

Törkiäneñ 15 töbägeneñ 10 sında qoş kizüe belän awıru oçraqları törkälgän. Distälägän keşe däwalanıp yata, berniçä keşe bu kizüdän wafat buldı. Qoş kizüe taralğannan birle, dönyanıñ törle töbäklärendä 80 yaqın kekşe wafat buldı inde. Rusiä Baş sanitar tabibı Genadi Onişçenko, rusiälelärgä Törkiägä barmasqa täqdim itä. Azatlıq radiosına, äle uzğan düşämbedä genä Törkiädän qaytqan Zilä Näcipova isä, Törkiädän totqarlanusız qaytıp bula di.

Keşelärdä panika yuq. Läkin küp keşe tawıq, yomırqa aşamıy. İstanbulda awıruçı keşene tapmadılar, şunıñ öçen dä panika yuq inde.

Ä menä, qoş kizüe Törkiädä tarala başlağannan soñ, hawa alanında nindi dä bulsa totqarlawlar, dezinfeksiä çaraları yuqmı digän sorawğa ul bolay dip cawap birde

Yuq. Törkiädä dä yuq, monda da yuq

Oçqıçlarda, hawa alannarında ayırım tabiplar tormıy, bagajlarnı tikşerüçe älegä yuq ide di Zilä.

Respublika xalqın tağın ber mä’sälä borçıy. Respublikadan xacğa kitüçelärneñ ber öleşe Törkiä aşa Rusiägä qaytaçaq. Tatarstan Diniä näzäräteneñ xac bülege xezmätkäre Aygöl Fazlieva, bu xäbär äzerlängändä, älegä tatarstan xacilarınıñ niçek qaytaçaqları bilgele tügel dip belderde. Qayber çığanaqlarğa qarağanda, alarnıñ yul marşrutı üzgärergä dä mömkin. Ğiraq aşa buluı ixtimal. Läkin, tögäl mäğlümlät pänceşämbedä genä bulaçaq dide ul

Kiçke yaqta, Ğäräpstanda xacilarnıñ qaytuı buyınça kiñäşmä uzaçaq. Şuña , marşrut üzgärtülär turında pänceşämbe yaqta ğına bilgele bulır. Bez bügen Tatarstan xacilarınıñ başlığı belän söyläştek, awıruçılar yuq. Barı tik, qayberäwlärneñ qan basımı üskän, qayberäwlärneñ temperatura ğına. Xac ämällären äybät kenä qılğannar.

Tatarstannan yıl sayın xacğa baruçılar sanı arta tora. Bıyıl isä, ül öç törle oyıştırılğan. Bäyäläre dä törleçä, 40 meñ rubl'dän alıp- 60 meñgä qädär ikän

Tatarstan Diniä näzaräteneñ xac bülege xezmätkäre Aygöl Fazlieva süzlärenä qarağanda, Tatarstan xaciları arasında iñ ölkäne 1921 yılğı, iñ yäşe 1981 yılğılar ikän. Alarnıñ isän-imin äylänep qaytasılarına ışanabız dide cawaplı xezmätkär.

Älegä Törkiädä dä taralıp ölgergän qoş kizü arqasında tuğan şaw-şular xacilar häm Törkiägä säfär qıluçılar öçen borçılu ğına bulıp qala. Tatarstanda, xodağa meñ şökerlär, bu kizü oçraqları älegä yuq

Räfis Cämdixan

XS
SM
MD
LG