Accessibility links

якшәмбе, 11 декабрь 2016, Казан вакыты 14:51

Yewropa Berlege Belarusqa tapşıruların Mart saylawlarına qädär başlayaçaq


Mart urtasında Belarusta pezident saylawları ütergä tieş. Şuşı saylawlar aldınnan Yewropa Berlege bu ilgä bäysez tele-radio tapşırular oyıştıru niäten beldergän ide. Ämmä soñğı könnärdä bu tapşırular saylawğa qädär ögerä almas digän xäbärlär taraldı. Sişämbedä Berlek räsmie bu xäbärlärne kire qağıp, bäygene otqan kompaniä ğinwar axırında bilgele bulaçaq, tapşırular saylawlarğa qädär başlanaçaq dip belderde.

Uzğan yıl Yewropa Berlege süz ireklege bastırılğan Belarusqa alternativ mäglümät çığanağı buldıru niäten beldergän ide. Ämmä soñğı könnärdä Berlek bu eşne saylawlarğa qädär başlap ölgermi, yä isä prezident Leksandr Lukaşenka rejimına qarşı qırıs adımnar yasarğa telämi digän xäbärlär taraldı.

Sişämbedä Yewropa Komissiäse süzçese Emma Udwin bu xäbärlärne kire qaqtı häm 2 million eurolıq proyekt 19 Martqa bilgelängän saylawlarğa qädär ük ğämälgä quyılaçaq dip belderde. "Saylawlarğa bağışlanğan maxsus tele häm radio tapşırular saylawlarğa qädäre ük bulaçaq," di Emma Udwin.

Uzğan atna Polşa mäglümät çaraları Belarusqa tapşırular başlaw öçen iğlan itelgän bäyge kiçekterelü säbäple, bu eş saylawlarğa qädär ölgermäs digän farazlar tarattı.

Ämmä Emma Udwin süzlärençä, tapşırularnı saylawlarğa qädär ük başlaw şartı kileşügä yazılğan bulaçaq. Ğärçä, tulı köçenä alar saylawlardan soñ ğına eşli başlar, dip östäde ul.

Yevrokomissiä wäkile süzlärençä, xäzer isemlektä 4 namzät qalğan, soñğı qarar berniçä atna eçendä qabul iteläçäk. "Min şunı raslıy alam: Belarusqa tapşırular başlaw öçen uñışlı nazmät Ğinwar ayında bilgele bulaçaq, yağni tağın 1 yä 2 atnadan," di Emma Udwin.

Belarusqa tele häm radio tapşırular başlarğa telägän kompaniälär arasında bäygene Yewropa Berlege uzğan yıl iğlan itte. İğlanda äytelgänçä, kiläçäktä İnternet kebek başqa media çaralarına çığu da küzdä totıla.

Emma Udwin süzlärençä, xäzer namzätlär isemlegendä 4 konsortsium bar, härberse ikeşär kompaniädän tözelgän: berençese - ike Polşa kompaniäse, ikençese - Rusiä belän alman, öçençese - ike Latvia şirkäte, nixayät, dürtençese - ber Litva häm ber Belarus komapniäse. Berlek quyğan şartlar arqasında Polşa, Litva, Latviäneñ keçkenä şirkätläre partnerlar ezlärgä mäcbür buldı.

Bäyge şartları nigezendä tapşırular Urıs häm Belarus telendä bulırğa tieş. Komissiä fikerençä, urıs telen añlawçılar Belarusta şaqtıy, häm dä andıy tapşırular kürşe Ukraina häm Rusiä töbäklärendä qızıqsınu uyata ala.

Uzğan yıl Yewropa Berlege Germaniäneñ Deutsche Welle kompaniäse belän Belarusqa tapşırular äzerläw turında keçkenäräk külämdä sınaw kileşüe tözegän ide. Bu kileşü nigezendä tapşırular uzğan yılnıñ 1 Noyäberendä başlandı häm 12 ay däwam itäçäk.

Ali Gilmi
XS
SM
MD
LG