Accessibility links

Кайнар хәбәр

Başqortstan wäkillegendä qorban bäyräme


Bu könnärdä Yekaterinburg şähärendä, Başqortstannıñ Sverdlovski ölkäsendäge daimi wäkillege binasında qorban bäyrämenä bağışlanğan kiçä uzdırıldı. Kiçägä ölkän yäştäge äbilär häm babaylar çaqırılğan ide. Daimi wäkil Näfisä xanım Tyumenseva cıyıluçılarğa Başqortstan xökümäte isemennän bäyräm qotlawı süzlären citkerde, Başqortstan möselmannarı diniä nazäräte räise, möfti Nurmöxämmät xäzrät Niğmätullanıñ Sverdlovski ölkäse möselmannarın qorban bäyräme belän täbrikläp cibärgän xatın uqıdı. Tügäräk östäl yanına cıyıluçı ölkännär, bik moñlı itep qor’än ayätlären uqıdılar, il-köngä tınıçlıq teläp doğa qıldılar. Annan soñ alarnı maxsus suyılğan qorban itennän peşerelgän tämle aş häm pılaw belän sıyladılar. Qunaqlar şuşı matur kiçäne oyıştırğanı öçen Näfisä Fäsxetdin qızına olı räxmät süzläre citkerdelär. Möxtärämä apa söyläwençä, Näfisä Fäsxetdinovna ölkännärne biregä ay sayın cıymıy qalmıy. Şuşında kilep yäm tababız, di ul. 1970 nçe yıllar başında, yıraq başqort awılınnan Yekaterinburgqa küçep kilgän çaqların iskä töşerep aldı. Yal könnärendä ike balamnı iärtep, uramda yöri idem, başqort telendä berär süz işetsäm ide, berär başqort oçrasın ide, dip äytep, di ul. Şul qädär sağınuğa çıdap bulmıy ide dip iskä aldı. Tuğan telne, tuğan moñnı işetergä zar-intizar bulıp yörgän çaqlar, şöker, ütte, dilär äbilär. Tuqsanınçı yıllar urtasında Näfisä Tyumenseva tarafınnan tözelgän başqort qorıltayı eşli başlaw belän, menä şundıy aralaşu kiçäläre, konsertlar oyıştırıla başlağan. Yäm östenä yäm bulıp, bu könnärdä “Bezneñ dairä” isemle başqort telendäge televizion tapşıru üzeneñ eşen yañarttı. “Bezneñ dairä” 2002нче yıl başınnan çığarıla başlap, 2003нче yılnıñ iyülendä tuqtalğan ide. İke yıl yarım tuqtap torunıñ säbäben aqça citmäwdän añlatalar tapşıru östendä eşläwçelär. Bu yıl başınnan Näfisä Tyumenseva tapşıru çığaru öçen çığımnar qaplaw cayın tapqan. Elek tapşıru ölkä televideniese kanalında çığarıla ide. Älegä ul kanal citäkçeläre belän kileşü tabılmağan. Yañarğan başqort tapşıruı ATN digän kanalda çığarıla başladı. Qızğanıç, bu kanal tapşıruların Yekaterinburg häm yaqın-tirädäge şähärlärdä yäşäwçelär genä kürä ala. Ayına dürt tapqır qabatlaw belän çığarılaçaq tapşıru öçen efir waqıtına 35 meñ sum aqça taläp itälär. Ä ölkä televideniese kanalında çığarıla torğan tatar häm ärmän tapşıruları öçen efirğa moña qädär ayına 24әр meñ sum aqça tüllänelä ide. Döres, yaña yılda yaña kileşülärgä äle qul quyılmağan. Şulay da milli tapşırular saqlanıp qalır digän ömet bar.

Fäwiä Safiullina, Yekaterinburg
XS
SM
MD
LG