Accessibility links

дүшәмбе, 5 декабрь 2016, Казан вакыты 17:32

Başqortstan Rusiägä quşılu yubileyına äzerlänä


Başqortstan belän Rusiä arasında yaña Kileşü tözü xaqındağı mäsäläne tikşerü respublikada ber zur yubileynı qarşı aluğa başlanğan äzerlek belän awazdaş kilä. Mäğlüm buluınça, kiläse yılnıñ cäyendä Başqortstan üzeneñ Rusiägä irekle quşıluınıñ 450 yıllığın bäyräm itärgä cıyına. İl prezidentı Vladimir Putinnıñ färmanı belän bu yubiley xätta federal'' status ta aldı häm bu yubileyğa äzerlekne häm anı ütkärüne oyıştıru komitetı räise itep Rusiäneñ finans ministrı Aleksey Kudrin täğäyenlände. Äytkändäy, Kudrin äfände yaña yıl aldınnan ğına Ufağa kilep şuşı komitetnıñ berençe utırışın ütkärep häm Ufada başlanğan yaña tözeleşlärne qarap ta kitte inde. Mäskäwgä qaytqaç, Kudrin äfände il prezidentı Putinğa Ufada başlanğan zur tözeleşlär barışınnan qänäğät buluın söylägän ide.

Başqortstanıñ Rusiägä quşıluınıñ 450 yıllığın bäyräm itügä äzerlek eşlärenä federal'' üzäktän häm Başqortstan yağınnan cämğısı 66 milliard sum aqça totışılaçaq, dip xäbär itelgän ide. Ämma bu san tağın da artaçaq, digän farazlar bar. Qısqası, Başqortstan citäkçeläre bu yubileynı bar ilne şaqqattırırlıq itep, bik kiñ qolaçlı bäyräm itmäkçe. Başqortstanda yubileyğa başlanğan äzerlek eşlärenä Mäskäw matbuğatı da iğtibar bülä başladı. Misal öçen, “Moskovskiy komsomoles” gäzite üzeneñ 12 ğinwar sanında şuşı temağa mäqälä bastırdı.

Älege bäyrämgä bülenüçe aqçalarğa Ufada bik küp tözeleş eşläre başqarılaçaq. Şuşı täñgäldä Başqortstan türäläre Qazan şähäreneñ üzeneñ 1000 yıllıq yubileyına niçek maturlanğanın iskä töşerep, “Ufa Qazannan da maturraq bulaçaq”, dip belderergä yarata başladı. Yäşägän cireñne maturlawda kürşeläreñ belän sälämät bäygegä çığu xäyerle eşter. İñ möhime – biredä yäşägän kiñ cämäğätçelek, ğadi xalıq öçen faydası bulsın.

XS
SM
MD
LG