Accessibility links

якшәмбе, 11 декабрь 2016, Казан вакыты 16:50

Başqortstanda Qorban bäyräme kiñ qolaçlı ütte


Küp kenä dini citäkçelär fikerençä, bıyıl Başqortstanda möselmannarnıñ iñ zur bäyrämnäreneñ berse - Qorban ğaete ayıruça zurlap, kiñ qolaçlı oyıştırıldı. Atnakiç könne Qorban bäyrämneñ soñğı öçençe könendä dä şuşı bäyräm uñayınnan küp kenä çaralar bulıp ütüe xaqında xäbär itelde. Respublika rayonnarında qorban çalular, qorbanlıq itlärne moxtaclarğa küçtänäçkä tapşıru atnakiç könne dä däwam itte.

Qorban çaldırularnıñ zur küpçelege Qorban bäyrämneñ berençe könendä, yäğni 10 ğinwarda uq başqarılğan bulsa da, çärşämbe häm atnakiç könnärendä dä Qorban çaldıruçılar şaqtıy bulğan. Ufadağı Tuqay uramındağı Cämiğ mäçetendä häm “İxlas” mäçetendä bäyrämneñ soñğı könendä dä qorban çaldıruçı din qärdäşlär bulğanlığı xäbär itelde. Ğomumän, bäyrämneñ öç könendä Tuqay uramındağı mäçet işegaldında 170, ä “İxlas” mäçete yanında 250гә yaqın sarıq häm 5 sıyır qorbanlıqqa çaldırılğan. Comğa könne “İxlas” mäçete ruxaniları biregä kilgän hämmä keşe öçen aş mäclese oyıştıraçağı häm qorbanlıq itlären moxtaclarğa öläşäçägen dä äytte.

Qorban bäyräme könnärendä respublikada tanılğan sänğät ostaları qatnaşlığında törle konsertlar häm kiçälär dä oyıştırıldı. Mondıy mädäni çaralar soñğı yıllarda inde ğädätigä äylänä bara. Başqortstan sänğät''kärläre arasında xätta dini temağa yazılğan cırlar häm mönäcätlär başqaruçı cırçılar buını üsep kilüe dä küzätelä. Misal öçen, tatar cırçısı Radik Dinäxmätov mönäcätlär başqaru ostası bularaq tanıldı. Mönäcätlär häm fol''klor cırlardan tulı ber repertuar tözegän ul. Älege Qorban bäyräm könnärendä dä Radik Dinäxmätov törle çaralarda qatnaştı häm yaratqan mönäcätlären başqardı. Bu janrdağı äsärlärgä tartıluı tarixın bolay iskä töşerä ul.

- Min ber konsertımnı da doğalardan häm mönäcätlär başqarudan başqa ütkärmim. Mönäcätlärne küptän başqaram, yaratıp başqaram. Berençe tapqır mönäcätlärne tanılğan fol''klorçı Rozaliä Soltangäräyewa başqaruında Mäcit Ğafuri isemendäge Başqort däwlät akademiä drama teatrında 1989 yılda işetkän idem. Şunda ğaşıyk buldım mönäcätlärgä. Ä öç yıl elek Qazandağı Bars-media şirkäte yärdäme belän gel mönäcätlärdän genä torğan kompakt tälinkämne çığaru bäxetenä ireştem, dide Başqortstanda yäşäp icat itüçe tanılğan tatar cırçısı, mönäcätlär başqaru ostası Radik Dinäxmätov.

Qorban bäyräme uñayınnan oyıştırılğan çaralar bıyıl Başqortstanda zurlap bilgelände. Anda ölkännär belän bergä yäşlärneñ häm balalarnıñ da küp qatnaşuı küzätelde. Qorban ğaete könnärendä respublikanıñ berniçä rayonında ör-yaña 4 mäçet tä üz işeklären açtı häm din totuçılar anda bergäläp täwge bäyräm namazların uqıdı häm wäğäzlär tıñladı.

Fänis Fätxi, Ufa

XS
SM
MD
LG