Accessibility links

шимбә, 3 декабрь 2016, Казан вакыты 16:45

Omskinıñ “Umırzaya” ansamble Muromsevo rayonınıñ tatar awıllarında bulıp qayttı


Uzğan şimbä-yakşämbe könnärendä Omskinıñ “Umırzaya” ansamble ölkäneñ tönyağındağı Muromsevo rayonınıñ tatar awıllarına konsertlar belän barıp qayttı. Tıñlawçılar xäterläsä, uzğan yılnıñ ğinwarında “Umırzaya” sänğät'kärläreneñ, 6 keşedän torğan törkem belän, bu rayonda konsertlar belän buluı turında “Azatlıqta” xäbär itkän idek. Bıyıl kollektiv yaña programma äzerläde, qatnaşuçılarnıñ sanı da küpkä artıq - 16 keşe buldı. Uzğan yılğı konsert programması asılda näfis süzdän häm cırlardan torğan bulsa, bıyılğı programma tatar, başqort, ğäräp iyülläre belän bayıtıldı. Häm äytergä kiräk, alar konsertqa kürkäm tös kerttelär.

“Umırzaya” kollektivı uzğan yılğı säfären qabatladı diärgä bula: rayonnıñ Tazlar, İnsäss häm Çurtanlı awıllarında buldı. Annan tış, Tazrlardan 18 çaqrım yıraqlıqta bulğan Novosibirski ölkäseneñ Tarlar awılına da barıp qayttı. Awıllarnıñ barsında da kollektivnı cılı qarşıladılar, qabat kilülären soradılar.

Uzğan yıldan ayırma bularaq, bıyıl kollektiv Muromsevo rayon üzägendä konsert quymadı. Anda yäşäwçe tatarlar üzläre, qayberläre ciñel maşinalarında, qayberläre taksilar alıp, rayon üzägennän 12 çaqrım yıraqlıqtağı Çurtanlı awılına konsert qararğa kildelär. Möxämmädiewlar ğailäse, konserttan soñ, kollektivnı töşke aşqa çaqırıp aldı. Anda tanışu, aralaşu bardı. Ansambl'neñ cırçıları xucalarğa borınğı tatar cırların da büläk ittelär. Şunı da assızıqlarğa kiräk, konsertlar tämamlanğannan soñ, ber genä awılda da xalıq öylärenä taralırğa aşıqmadı. Bayanğa quşılıp cırlawçılar häm biüçelär küp buldı.

Muromsevo rayonınıñ tatar awıllarındağı mäktäplär turında da ber niçä süz. 3 awılda da mäktäplär başlanğıç qına. 5-nçe sıynıfqa balalar kürşe rus awıllarına yörilär. Awıl yäşläreneñ kübeseneñ, eş ezläp şähärlärgä küçep kitüläre säbäple, mäktäplärdä uquçılar sanı kimegän. Çurtanlıda, mäsälän, bıyıl awıl mäktäbenä 3 kenä bala yöri, 5 bala kürşe awılda uqı. Tatar awılları mäktäplärendä tuğan tel uqıtıla. Tazlar mäktäbenä uzğan yıl Tatarstannan tatar tele däreslekläre kilgän. Balalarnıñ kübese tuğan telen belep üsä.

Tatar awıllarındağı klublar turında da ber-niçä süz äytü urınlı bulır. Tarlar häm Çurtanlı awıllarında maxsus salınğan klublar yuq. Klub itep mäktäplär yaraqlaştırılğan. Klublarnıñ kiräkle cihazları ğına tügel , östäl-urındıqları da yuq. İnsäss awılında ğına klub tözebräk xäldä. Küp bulmasa da urındıqları bar, miçe yağıla, stenaları ağartılğan, idännäre buyalğan. Konsert kiler aldınnan klubta eşläwçe Marat Nizametdinov 2 kön buyına miç yağıp, klubnı cılıtqan. 11 yıl elek klubqa eşkä kilgäç, ifrat tawşalğan binanı klub itep tözekländerü eşlären ul üze başqarğan. Bez xäzer klubta kiçälär oyıştırabız, törle bäyrämnär ütkäräbez ,- di Marat äfände.

Äytergä kiräk, klubta eşläwçelärneñ xezmät xaqları zurdan tügel. Älbättä ul tormış alıp baru öçen citmi. Awıldaşları kebek Nizametdinovlarğa bäräñge utırtırğa, mal asrarğa turı kilä. Alarnıñ 4 sıyırlar, 4 atları bar. “Söt may, it satıp kön küräbez”,- di xucabikä Güzäliä xanım. 16 keşedän torğan “Umırzaya“ kollektivın alar, öylärenä çaqırıp, qunaq ittelär. Kiñ küñelle xucalarnıñ bar keşegä dä urını tabıldı.

“Umırzaya” sänğät'kärläre dä Muromsevo rayonında bulğan oçraşulardan qänäğät qaldılar. “Şulay, çın küñel belän qarşı aluçılar, yotlığıp konsert qarawçılar bulğanda , awırlıqlar da, yul ğazapları da onıtıla, millättäşlärebez belän qabat oçraşası kilä”,- didelär alar.

Saniä Mixaleewa, Omski

XS
SM
MD
LG