Accessibility links

шимбә, 10 декабрь 2016, Казан вакыты 06:14

Paqstanda Äl-Qaidä yuğarı citäkçese äz-Zäwähirigä qarşı höcümdä 18 keşe hälak buldı


Paqstan bügen 13-nçı ğinwarda ilneñ tönyaq-könçığıştında kimendä 18 keşene ütergän höcüm öçen AQŞ ilçelegenä räsmi protest belderde. İslamabadtan 200 çaqrım tönyaq-könbatışta Damadola awılındağı qorbannar arasında xatın qızlar häm balalar da bar. Xäbär agentlıqları höcüm Äl-Qaidäneñ yuğarı citäkçese Ayman äz-Zäwähirigä häm baqşa suğışçılarğa qarşı oyıştırılğan dip belderde. Äz-Zäwähiri isän qalğan bulırğa oxşağan.

Bügen Paqstannıñ mäğlümät ministrı Şäyx Räşit Äxmät matbuğat oçraşuında "Paqstan xökümäte mondıy xällärneñ qabatlanuına yul quymıyaçaq" dide. Äxmät AQŞ ilçeseneñ tışqı eşlär ministrlığına çaqırılaçağın belderde. Höcüm Paqstannıñ Äl-Qaidä citäkçelegendä 2-nçe urında torğan äz-Zäwähiri yäşerengän dip isäplänelüçe töbägendä Damadola awılında buldı.

Xäbär agentlıqları Paqstannıñ isemnäre atalmağan 2 yuğarı räsmieneñ äz-Zäwähiri höcüm urınında bulmağan digän süzlären kiterä. Baştaraq äz-Zäwähirineñ üterelgän bulırğa mömkin digän xäbärlär buluı häm Paqstan räsmiläreneñ bu mäğlümätne tikşerüe turında äytelde.

Paqstan tışqı eşlär ministrlığı berençel tikşerülär höcümneñ Äfğänstan çişe aşa yasalğanğa oxşawın kürsätä dip beldede. AQŞ saqlanu ministrlığı ul töbäkkä bernindi dä häcüm bulmadı dip ğäyepläwlärne kire qaqtı.

Mäğlümät ministrı Äxmät tınıç xalıqnıñ ülüenä tirän qızğanıç belderde şul uq waqıtta "bez bu töbäkne andağı barlıq ğazaplar häm köç qullanu öçen cawaplı çit il keşelärennän çistartu öçen küptännän tırışıp kiläbez" dide.

Damadola awılı urnaşqan Bajur rayonında meñnärçä keşe kiçäge höcümgä protest belderde. Demonstratsiäçelär AQŞ xalıqara tärräqiät agentlığı urnaşqan binağa ut törtte. Politsiä demonstratsiäçelärgä qarşı yäş gazı qullandı. Açulı Damadola awılı xalqı höcüm waqıtında äz-Zäwähiri awılda yuq ide di.

Äz-Zäwähiri uzğan aylarda berniçä videoda kürenep Möselmannarnı AQŞ-qa qarşı berläşergä çaqırdı häm yaña höcümnär belän yanadı. İyül ayında Londonda bulğan şartlawlardan soñ küp tä ütmästän ul "Äy, amerikannar, sezneñ New York häm Waşingtonda kürgännäregez, Äfğänstan häm Ğiraqtağı yuğaltularığız, matbuğatnıñ barlıq yäşerülärenä qaramastan, äle başlanğış yuğaltular ğına. Ägär dä Mösellmannarğa qarşı agressiä säyäsätegezne däwam itsägez, Vietnamda kürgännäregezne onıttıraçaq qotoçqıç xällär küräçäksez" dide.

Mısırda tuıp üskän tabib äz-Zäwähiri radikallar belän yäştän ük elemtägä kergän dielä. Suğışçanlıq öçen ul 3 yıl Mısır törmälärendä utırğan. 1981-nçe yılda Mısır prezidentı Änwär Sadatnı üterüdä qatnaşqan dielä.

1980-nçe yıllarda ul Äfğänstanda sovet okupatsiäsenä qarşı suğışta yaralanğan suğışçılarnı däwalaw öçen Paqstanğa kitä. Şul çaqta ul Usama bin Laden belän tanışa.Häm 1998-nçe yılda bin Ladennıñ AQŞqa qarşı höcümnärgä çaqıruına quşıla. Berniçä atnadan Keniä häm Tanzaniädä AQŞ ilçelekläre şartlatıla. AQŞ bu höcümnär öçen äz-Zähärine ğäyepli.

Ul äl Qaidäneñ planlaştıruçısı sanala. Äz-Zäwähiri AQŞ iñ qatı ezlägän keşelärneñ berse. Anıñ başı öçen 25 million dollar wäğdä itelde.

Naif Aqmal, Praga.
XS
SM
MD
LG