Accessibility links

шимбә, 10 декабрь 2016, Казан вакыты 06:11

Tatarstan suıqlar belän sınawnı niçek ütä?


Tatarstanda häm anıñ başqalasında zämhärir suıqlar tora. Tönlä Qazanda termometr 39 gradus kürsätkän. Köndez, hawalar beraz cılınıp, 27 däräcä salqın buldı. Mondıy suıqlar, soñğı tapqır, 6 yıl elek bulğan ikän. Hawalar äle atna buyı şulay salqın bulıp toraçaq ikän. Pravoslavlar bu könnärdä, Kreşenie, Çuqındıru bäyrämenä äzerlänä. Salqın suğa çumu yolası da, suıqqa qaramastan, ütkärelergä tieş, dip xäbär itelä. Salqınnar säbäple, Tübän Kamada, Şähär avtobuslarınıñ 3tän ber öleşe uramnarğa çığa almağan. Qazandağı avtobuslar turında andıy xäbärlär yuq. Här törle maşina yörtüçe mondıy salqınnarda, ğädättän tış çaralar kürä. Bezgä bilgele bulğança, bu tönlä, 38-39 däräcä salqında Qazandağı maşina yörtüçelär, tön buyına ber niçä tapqır torıp çığıp, maşinalarnı qabızıp, eşlätep torğan, motorların cılıtqan. Qaysıberläre maşinalarnı quyıp, şähär transportı belän yörep torırğa bulğan. Zämhärir suıqlarda balalar, inde ikençe kön rättän, uqırğa yörmi. Bar respublika buylap, mäktäplärdä däreslär ütkärelmi.

Tabiplarğa, bu könnärdä, eş küp. Aşığıç yärdäm stansiäse xäbär itkänçä, ütkän töndä genä 31 keşe qul, ayaqlarnı öşetep, tabiplarğa möräcäğat itkän. 1 täwlekkä 120läp keşe zıyan kürgän. İke distägä yaqın keşene, däwalanırğa, şifaxanägä salğannar. Alar arasında yortsız keşelär, bomjlar bulğanmı yuqmı, xäbär itelmi. Ämma bu salqınnarda, iñ awırı – alarğa elägä. Bomjlarnıñ sotsial adoptatsiäse öçen barlıqqa kilgän maxsus üzäk, xäzerge waqıtta, andıy yortsız keşelär belän tulı. Tön ütkärü bülege başlığı Şafiğullina Fäwziä xanım äytkänçä, köndä, alarğa 5, 6 yortsız keşe kilä. Ämma alar, yaña kilgän bomjlarnı qabul itä almıy. Çönki, 54 urınğa dip isäplängän adoptatsiä üzägendä bar urınnar da alınğan. Bu könnärdä ber keşe çığarğa tora, bälkem şunnan soñ, yaña ber yortsız keşene qabul itä alırbız, di Şafigullina Fäwziä xanım. Anıñ äytüenä qarağanda, kilgän keşegä barıber, nindi dä bulsa yärdäm kürsätelä. Kiñ küñelle qazanlılar alıp kilgän cılı kiemnär birelä, iğänäçelär aqçalarına alınğan aşlar, qıtay toqmaçı birelä, didelär sotsial adoptatsiä üzägendä. Älege üzäk, äle bu yılnıñ avgustında ğına açılğan. Ämma anıñ turında küpçelek yortsız keşelär belä. Üzläre, ezläp tabıp kilä ikän. Ämma äytkänebezçä, bu zamança üzäktä, urınnar inde közdän birle yuq, bu zämhärir suıqlarda, qalğan yortsız keşelärgä, cılınu urınnarın üzlärenä xästärlärgä turı kilä.

Bikä Timerova.

XS
SM
MD
LG