Accessibility links

шимбә, 3 декабрь 2016, Казан вакыты 05:39

“Milli kitap” näşriätendä “İstälekle häm onıtılmas datalar kalendarı 2006” basılıp çıqtı


Kalendar’ğa kertelgän istälekle datalar Tatarstannıñ ictimaği, säyäsi, xucalıq, mädäni tormışındağı töp waqiğalarnı häm faktlarnı, şulay uq kürenekle şäxeslärneñ - yazuçılar, fän, mäğärif, mädäniät, häm sänğät eşlekleläreneñ yubileyların çağıldıra. Yubiley dataları uñayı belän faydalanu öçen tatar häm rus tellärendä beleşmä tekstlar, bibliografik ädäbiät isemlekläre birelä.

Bu kalendar' Tatarstan Respublikası Milli kitapxanäseneñ tatar ädäbiäte häm tuğan yaqnı öyränü bülege mödire Ğolaram Comağolova tarafınnan tözelgän. Kalendar'neñ cawaplı möxärrire Nail Kambeev. Anıñ tirajı 100 danä genä. Häm ul respublikanıñ rayon kitapxanälärenä buşlay cibäreläçäk. Bu keçkenä genä , ämma bik ähämiätle häm qäderle kitapçıq – beleşmäneñ tözüçese Ğolaram Comağolova anıñ niçek tözelüe turında söyläde. Ul şulay uq bıyıl nindi zur waqiğalar kötelüe turında da äytep ütte.

“Yıl sayın çığa torğan beleşmälek elek 1960 nçı yıllardan uq 1968 yıllarğa qädär tözelä ide. Annan beraz tuqtalıp tordı. Annan soñ 1996 yıldan tekstlar birelep şundıy sıyfatta tözelä başladı . Miña xätle 1970 yıllarda tatar ädäbiäte häm tuğan yaqnı öyränü bülege citäkçese Fäğilä Ğafurova tözi ide. Xäzer berniçä yıl inde menä min tözim .Ämma minem redaktorlarım bar, alar mine tikşerälär. Bıyıl 2006 yıl üzeneñ istälekle yubileylarğa bay buluı belän ayırılıp tora. 15 fevral'dä geroy şağir Musa Cälilneñ tuuına 100 yıl tula. Xalıq şağire Ğ.Tuqaynıñ tuuına 120 yıl , dekaber ayında tatar teatrınıñ oyışuına 100 yıl tula. Qamal teatrınıñ zur şäxesläre bulğan , anıñ berençe rejisserı Ğ. Karievnıñ tuuına 120 yıl, xalıq rässamı Mä'mün Sutyuşevnıñ tuuına 100 yıl häm Rossiäneñ häm Tatarstannıñ xalıq artistı Ğaliä Bulatovağa 100 yıl häm başqa kürenekle teatr ähelläreneñ yubiley dataları da kalendar'gä kertelgän”.

“2006 yılnıñ istälekle häm onıtılmas datalar kalendare”neñ eçtälege belän internet qa kerep tanışırğa bula. Säxifäneñ adresı www.kitapxane.ru/ , rusçası yaxşı itep eşlängän , ämma tatarça tekst äle säxifägä kerep qararlıq itep eşlänep betmägän. Ul äle eşlänep kenä kilä.

Mälikä Basıyr, Qazan.

XS
SM
MD
LG