Accessibility links

чәршәмбе, 7 декабрь 2016, Казан вакыты 21:41

Başqortstanda salqınnar qazalar tudıra


Başqortstanda salqın hawa xaqimlege könnän-kön köçäyä bara. Atnaqiç könne respubliknıñ törle öleşlärendä salqınlıq 40 däräcägä citkän urınnar da buldı. Ufada isä köndez 32-34 däräcä salqın ide. Comğa könne Ufada salqınlıq şulay uq 40 däräcägä yaqınayaçaq dip xäbär itelde. Xäzer mäktäplärgä yuğarı sıynıflar uqıçıları da yörmi. Transport eşçänlegendä özekleklär bar. Şuña kürä dä irtänge yaqta eşkä baruçılar öçen iñ çitene turı kilä. Elek yarım buş yörgän autobuslarnı, tramway häm trolleybuslarnı xäzer xalıq küp köç häm höcüm belän genä ala.

Uzğan proğrammabızda Ufanıñ Ordjonikidze rayonında, cılılıq çeltärlärendä bulğan awariä näticäsendä, çärşämbe könne 23 yortnıñ cılılıqtan özelüe xaqında xäbär itkän idek. Küpqatlı yortlarda meñnärçä keşelärneñ küpme waqıtqa qädär salqın yortlarda qalaçağı turındağı soraw küplärne borçıdı. Şuña da bu hälaqät näticälären beterügä Ordjonikidze rayonınıñ küp köçläre cälep itelgän. Atnaqiç könne irtän irtük bu qazanıñ ni xäldä buluın yüelü öçen “Azatlıq” xäbärçese Ordjonikidze rayonınıñ Toraq-kommunäl xucalığı idaräse başlığı Älbert Aslayıvqa möräcägät itte. Älbert äfändeneñ käyefe kütärenke ide. “Älege awariäne kiçke säğät unbergä ük tulısınça tözätep bettek, - di Älbert Aslayıv. – Cılılıq baruı özelgän yortlardağı fatirlar älläni sunıp ta ölgermägän. Monı bez urınbasarlarım belän törle yortlarnıñ fatirlarına kerep, üzebez şäxsän tikşerep yördek”. Älbert äfände äytüençä, bügen barlıq yortlarda da cılılıq häm cılı su, ğädättägeçä, üz tärtibe belän kilä. Kiläçäktä mondıy awariälärneñ bulmasına berkem dä ğarantiä birä almıy. Ämma alarnı tiz arada beterü öçen, bezneñ köçlär citärlek dip ışandıra Toraq-kommunäl xucalıq idaräse başlığı.

Çärşämbe kiçen Ufada tağın ber qaza bulıp aldı. Başqalanıñ Kirov häm Lenin rayonnarında ber säğätkä yaqın elektr energiäse özelep tordı. Ämma monı xalıq älläni zur bäla itep qabul itmäde. Kiçke çäylären zapastağı şämnären çığarıp, şul şäm yaqtısı astında eçtelär. Ä inde ber säğät eçendä utnı yañadan birdelär. Respubliknıñ başqa şähärlärendä cılılıq özelü, yağni başqa törle awariälär xaqında älegä xäbärlär yuq. Xäyer, bulsa da alar turında kiñ cäyelep söylämäskä, paniqa tudırmasqa tırışalar. Bu inde elektän qalğan ğädät.

Salqınlıq arqasında öşep, ayaq qulların tuñdırıp xastaxanälärgä elägüçelär dä könnän kön arta. Äle soñğı ike köndä genä Ufada 120 tiräse keşe ayaq-qulların tuñdırıp, xastaxanägä kiterelgän. Alarnıñ zur küpçelege yä yort-cirsez keşelär, yä eçkän kileş üz-üzen beleştermi yörgän keşelär. Ufadağı 22 xastaxanä xirurğı Tahir Mäwletov süzlärençä, bu xastaxanägä unber keşe kiterelgän. Alarnıñ öçeseneñ ayaq häm qul barmaqları nıq tuñğan, şuña kürä dä alarğa xirurgik yärdäm genä kürsätep bula. Aldağı könnärdä salqınlıq 40-45 däräcägä citkäç, xastaxanälärgä kiterelüçelär sanınıñ tağın da artuı kötelä.

XS
SM
MD
LG