Accessibility links

сишәмбе, 6 декабрь 2016, Казан вакыты 11:20

Xacilar qayta başladı


Başqortstannan izge Xac säfärenä kitkän ber zur ğına törkem din qardäşlär çärşämbe kiçendä Ufağa qaytıp töşte. Ufa hawa alanında xacilarnı, ä alar cämğıse 340 keşe, tuğannarı, balaları bik cılı kiemnär alıp kilep qarşı aldı. Şularnıñ 120se Başqortstannıñ üzennän, qalğannarı kürşe Çiläbe, Irımbur, Perm ölkälärennän häm başqa töbäklärdän. Älege törkem xacilarnı şuşı izge säfärdä yörtep alıp qaytqan “Eyr-tur” şirkäte xezmätkärläre Başqortstannan barğan hämmä keşeneñ tuğan yaqlarğa isän-saw, bäla qazalarsız äylänep qaytuın belderde.

Ufa hawa alanında xacilarnıñ şatlıqlı awazları ozaq yañğıradı. Alar biregä üzlären alıp kitäse autobuslar häm maşinalar kilgänçe, tuğannarı häm jurnalistlar belän älege säfär täessoratları belän büleşte. Başqortstannıñ Sibay şähärennän bıyıl bu säfärgä iñ küp keşe – 14 keşe barğan ikän. Alar da isän-saw häm bik bäxetle bulıp qaytqan. Fäniä apa Arğınbayıwa belän Rufiä apa Soltangildina “Xac säfäre mäñge istä qalırlıq buldı, bötenläy başqa keşe bulıp qayttıq”, di. Başqortstannı da sağınğan alar.

Rufiä häm Fäniä apa: - Xacdan şulqädär ruxlanıp qayttım, şatlığım eçemä sıymıy. Äytelgän bit Xacda bulğan keşedän gönahları kipkän qabırçıqtay qoyılıp töş dip. Nindider ciñellek häm kütärenkelek sizäbez üzebezdä.

Rufiä apa: - Başqortstanıbıznı nıq sağınıp qayttıq. Älbättä, Allah yortında da räxät. Anda da bezne bik cılı qabul ittelär. Qunaq ittelär. Bik küp täessoratlar belän şatlanışıp qayttıq. Ämma üzebezneñ tuğan yaqnı da sağınıp bettek.

Xac säfärennän Ufağa äylänep qaytqan Fäniä Arğınbayıwa belän Rufiä Soltangildinalar buldı bu. Fäniä apa bu säfärgä üze genä tügel, ä tormış iptäşe Marat abıy belän bergä barğan.

Comğa könne Ufağa tağın ber törkem xacilar qaytıp töşärgä tieş. Alarnı bu izge säfärgä “İxlas” mäçete xezmätkärläre oyıştırıp cibärgän ide. Ul törkemdä 40tan artıq keşe.

XS
SM
MD
LG