Samar tatar milli xäräkätenä uncide yıl. Menä şul yıllarda kemnär genä eşlämägän dä, kemnär genä kilmägän cämğiätkä. Waqıt uza, keşelär almaşına, ä maqsat ber ük qala, cämğiät äğzalarınıñ ruxi qiblaları nıq qala birä. Oluğ qorban ayında “Tuğan tel” isemle Samara ölkä tatar cämğiäte häm Samar şähäreneñ milli- mädäni möxtäriäte üzeneñ berläşterelgän yomğaqlaw utırışın uzdırdılar. Kön tärtibendä zur waqiğa tordı- ul Qorban aşın zurlap uzdıru häm şul uq tabında uzğan yılnı yomğaqlaw häm yaña yılnı nindi eşlär belän bizärgä. Mäcleskä milli ixtiaclarğa iñ zur matdi yärdäm kürsätkän eşquarlarıbız da çaqırılğan ide. Tabında millät, dinebez faydasına yärdäm kürsätkän distälägän eşquarlarıbız maqtap telgä alındılar, alar isemenä räxmätlär yañğıradı. Bügenge köndä törle fikerlär yañğırıy. Kemder mäscedlär sanın ğına ürçetü yağında bulsa, ikençeläre gıybädätxänä tözüne tuqtatıp mäktäplär sala başlarğa öndilär, öçençeläre sänğät'kä basım yasıy. Ä menä Samar şähäreneñ milli- mädäni möxtäriäte räise Äxmädulla uğlı Cämil Wäliullin fikere mondıyraq: ”Keşegä baş kieme dä, ayaq kieme dä, külmäk- çalbar da, öske kiem dä kiräk bulğan kebek, millät mäscedenä dä, mäktäbenä dä, sänğätenä dä moxtac. Balasın çın möselmança tärbiälär öçen atasınıñ mäsced yulında buluı mäcbüri, anasınıñ namazlıq östendä buluı kiräk. Bügen käfer- yähüdi sänğätendä adaşqannarğa tatar moñın işetü zaruri. Başqarılğan eşlärgä tap töşermik. Mäscedlär küp bulalmıy, alar äz buluları bar. Menä Samarnıñ borınğı öleşendä tarixi mäscedebez üzebezgä qaytarıldı. Xäzer anda comğa sayın yaña 60- 80 keşe namazğa kilä. Ägär dä Samarnıñ här rayonında mäsced eşläsä anda da yaña keşelär namazlıqqa basaçaq. Ruslar çat sayın çirkäw sala. Ber genä urısnıñ da nigä tağın çirkäw salasız?- digäne yuq äle. Bıyıl Qorban bäyrämendä tatar bayları aqçasına 33 sarıq suyılıp yarlılarğa tarattıq, cide yözgä yaqın keşegä bäyräm küçtänäçlären öläşep çıqtıq.”
Aldağı yılnı bäyrämnär matur uzdı. Menä tizdän Näwrüz citär. Bıyılğı Näwrüzneñ barlıq çığımnarın üz östenä “Tatarstan” säwdä yortınıñ general' direktorı Fäxretdin Kanyukaev alaçaq, ä Sabantuy çığımnarın ikegä büldelär. Köräşkä büläklärne Xäbil Biktaşev cıyaçaq, ä Sabantuynıñ sänğät bülegendäge çığımnarnı Cämil Wäliullin komandası üz cilkäsenä ala.
Cämğiät utırışında Samar gubernatorınıñ Baş iqtisatçısı häm investitsiä belgeçe Ğabibulla äfände Xasaev ta qatnaştı. Milläte buyınça dağstanlı bulğan Ğabibulla Rabadanoviç tatar milli xäräkäte turında bolay dide: “Bügenge köndä mädäni üzäklär cämäğätçelek fikeren tuplaw urını bulıp qala birälär. Biredä törle milli oyışmalar ber- berse belän tanışalar, yaña elemtälär, yaña mönäsäbätlär urnaşa. Ä näticäse ber- üseş. Bügenge köndä tatar milli xäräkäte, tatar milläte töbäktäge totrıqlıqnıñ bizmäne bulıp qala birä. Min şunı äytäsem kilä, xakimiät tä milli ixtıäclardan çittä tormıy. Menä şulay kiñäşep eşlägän xäldä alda uñış kötär dip uylıym”, - dide gubernatornıñ Baş iqtisatçısı häm investitsiälär belgeçe Ğabibulla äfände Xasaev tatar milli xäräkäte uzdırğan Qorban aşında.
Samar tatar milli xäräkäte uzdırğan Qorban aşı tınıç, eşlekle söyläşü belän uzdı. Milli xäräkät liderlarınıñ küpçelege namazlıq östendä buluı da süz belän ğämälneñ ayırılmağanıñ kürsätä. Qorban aşında Qor’änne Samar şähär milli- mädäni möxtäriäte räise Cämil Wäliullin uqıdı.
Şamil Bahautdin, Samar.
