Accessibility links

якшәмбе, 4 декабрь 2016, Казан вакыты 13:10

Ural cirendä qatı salqınnar däwam itä


Ural cirendä inde atnağa yaqın köçle salqınnar xökem sörä. Sverdlovski ölkäseneñ qayber rayonnarında hawa temperaturası kürsätkeçe 40 gradustan da tübänräk töşep kitä. Bu xäl toraq-kommunal' xucalıqları, energetiklar, transportçılar öçen citdi sınaw bulıp tora.

Qışqılıqqa äybät itep äzerlänä almağan qayber şähärlärdä äledän-äle ğädättän tış xällär kilep çığa. Ölkäneñ iñ yıraq tön'yaq noqtası bulıp sanalğan İvdel' şähärendä, salqınnar arqasında par qazannarı saftan çığu säbäple, inde berniçä kön toraq yortlar cılıtılmıy. Yortlarda cılılıq 1 gradus çaması. Kamenski-Ural'skida elektr energiäse çığanaqlarına köç kilgänlektän, zur avariä bulıp, 7000 keşe yäşägän mikrorayon utsız, susız, cılısız qaldı. Ölkä xökümäte tarafınnan tiz arada salqınnar arqasında kilep çıqqan ğädättän tış xällärne beterü öçen operativ ştab tözelde.

Ural başqalası bulıp sanalğan Yekaterinburg şähärendä dä bu könnärdä äledän-äle törle xällär bulıp tora. Qatı salqınnar xalıqnı öylärenä quıp kertte, şähär uramnarında xalıq ta, transport ta bermä-ber kimede. Mäktäplärdä çirattan tış kanikullar barlıqqa kilde. Uramda barası cirenä berniçek tä barmıy qalırğa yaramıy torğannar ğına oçrıy.

Şähär elektr transportı idäräse tramvay-trolleybuslarnıñ eşen tuqtawsız tä'min itärgä tırışsa da, salqınnar arqasında törle xällär bulıp tora. Berniçä kön elek ber tramvay rel'stan töşep kitkän ide. Bäxetkä qarşı, häläkät kürüçelär bulmadı. Şulay uq trolleybus liniäläreneñ dä bik çıdam bulmağan oçraqları bar. Ber passajir bezgä salqınnan liniä bozılu säbäple, trolleybus toksız qalğanlıqtan, eşkä cäyäw yögerergä turı kilgänlege turında söyläde:

Cılı garajlı taksi idäräse citäkçeläre söyläwençä, bu könnärdä taksiğa zakazlar sanı küp tapqırğa artqan. Maşinalar sanı citeşmi, şuña kürä bar xalıqnıñ ixtıäcın qänäğätländerä almıybız, dilär alar. Şähärneñ iñ ere marşrut avtobusları predpriätiese citäkçese Rinat Sadriev bu könnärdä liniäğä; avtobuslarnıñ 60 protsentı ğına çığa, dip belderde.

Energetiklar xäbär itüençä, Yekaterinburg şähärendä häm Sverdlovski ölkäsendä salqınnar başlanğaç elektr energiäsen qullanu un protsentqa artqan. Elektr cılıtu priborları qullanu arqasında qayber iskeräk küp qatlı yortlarda, elektr çıbıqları tüzmiçä, yanğın çığu oçraqları da buldı. Şuña kürä maxsus tözelgän operativ ştab elektr energiäsen küp qullanuçı yortlarnı uttan özärgä digän qarar çığardı. Üzegez saylağız, yänäse, yä cılıda, yä utsız utırasız.

Qayber mäğlümat çaraları xäbär itüençä, Ural salqınnarı biredä xezmät itüçe yäş soldatlarnıñ sälämätlegenä citdi zıyan kitergän. Yuqa ayaq çolğawı qatı salqınnardan saqlıy almıy. Küp kenä yäş soldatlar, üpkä yalqınsınuı awıruı belän xastaxanägä ozatılğan.

Şähär xastaxanälärenä bu könnärdä salqınnan zıyan kürep öşüçelär genä tügel, suqbaylar, bomjlar da möräcäğät itä ikän. Xoquq saqlaw orğannarı uramda oçrağan bu biçaralarnı maxsus cılıtılğan furgon belän cıyıp yörep, şähärdäge berdänber yortsızlar öçen äzerlängän binağa kiterä. Ämma biredäge cılı urın öçen az ğına bulsa da tüläw kiräk bulğanlıqtan, suqbaylar buşlay xastaxanägä elägüne qulayraq kürälär.

Şulay itep, ozaqqa suzılğan qatı salqınnar Ural başqalasınıñ ğädättäge şawlı tormışın tuqtatıp torğan kebek buldı. Fitnes-zallar, klublar, restorannar, zur-zur säwdä yortları buşap, tınıp qaldı.

Ural cirendä 35-40 graduslı salqınnar qış sayın ber-ike kön bulıp ala inde ul. Ä menä mondıy ozaqqa suzılğan salqınnarnı xätergä töşerüçe tabılmadı. Sinoptiklar fikerençä, yaqın aralarda hawa torışında üzgäreşlär kötelmi.

Fäwiä Safiullina

Yekaterinburg.

XS
SM
MD
LG