Accessibility links

Кайнар хәбәр

Bu qädär qatı salqınnar Tömän ölkäsendä 100 yılğa berençe tapqır


Bu zämähir salqınnarğa iñ quanğanı mäktäp uquçılarıdır. Menä berniçä kön inde Tömän radiosı uqular bulmıy dip xäbär itä. Tömän rayonı Şıqça urta mäktäbe belän telefon aşa bäyläneşkä keräm.

Mäktäpneñ uqıtu eşläre başlığı Ruzilä Xismatullina äytüençä, öylärendä radioları bulmağannarnıñ qayberläre mäktäpkä kilep tä quya ikän. Uquçılarnıñ 3-4 kenä buluına qaramastan däreslär ütkärälär dä qaytarıp cibärälär. “Uramda ber kem dä, etlär dä yuq xätta”,- di zavuç.

Suqbaylar, yort-cirsezlär qayda cılınu urını taba soñ?- digän sorawğa cawap ezläp Tömän avtovokzalına atlıym.

“Qızım Tömändä kolledjda uqi, anıñ piçen yağarğa kildem. Könenä ike tapqır yağabız. Bügen uqımıy, şuña kürä qaytıp baram. Ayına 2 meñ sumğa öy alıp torabız. 4 meñ yarımğa utın aldıq. Bälki yazğa qädär citär”,- di Mullaş awılına qaytuçı yulçı.

“Qızımnıñ qışqı itegeneñ ükçäse yarılğan. Salqınğa tüzmägän. Şuña itek kiterdem”,- di ikençe yulçı.

“Minem ayaqta kiez itek. İ räxät tä soñ, Qazan yaqlarınnan yıl da kiterep satalar”,- di tağın beräw.

“Salqın seberdä iñ yaxşısı kisi. Anı bolannıñ ayaq tiresennän eşlilär. Annan çigälär. Ul iñ cılısı”,- dip süzgä quşıla tağın ber yulçı.

Äñgämädäşlär Toboldan Flürä Sayfullina, Mullaştan Älfiä Xälilova, Räymä Xäliullina, İnderäydän Ğaliä İsinä härkem üz yulı belän kitte. Bu qırıqqa citärdäy salqınnarda raspisaniädäge barlıq awıl-qalalarğa da avtobuslar baramı soñ? Mikofonnı mäğlümat täräzäsenä tığam. Anda utırğan xatın-qız: “Tömännän kitä torğannarı barsı da yulğa quzğala. Tik menä kürşe Kurgan, Sverdlau ölkäsennän genä bügen 10 nan artıq avtobus kilmäde”,- di.

Tömän avtovokzalında xäyran ğına waqıt ütkärsäm dä ber genä suqbay da küzgä çalınmadı. Militsiä xezmätkärläre bülmäsenä kersäm, alar da cılıda kofe eçep utıra idelär. “Magnitafonıñnı totaştırsañ ber süz dä äytmibez”,- didelär. Süzläre xaq bulsa, bu salqınnarda yort-cirsezlär avtovokzalğa kilep kersä quıp çığarmıylar ikän. Başqa qalalarda suqbaylar öşep ülmäsen dip maxsus kürsätmälär çıqqan. Cılı aşlar, qunar urınnar äzerlängän. Tömändä östän berär käğäz kilmäde mikän dip Lenin rayonı eçke eşlär bülegenä çıltıratam. Alar äytüenä qarağanda, ber nindi dä kürsätmä bulmağan.

Ä menä qatı salqınnar isä cinayätçelekneñ sannarına da qatı ğına suqqan ikän. Lenin rayonınıñ eçke eşlär bülege başlığı İrenbäk Söeşev süzlärençä, cinayät qılu 50 protsentqa ğına qalğan. Sinoptiklarnıñ süzlärenä qolaq salsaq äle ğinuarnıñ 24-25 lärenä qädär salqınnar däwam itäçäk. Tömän şähäreneñ gidrometereologiä üzäge başlığı Yılena Şarum mäğlümat oçraşuı waqıtında: “Salqınnarnı suıq seber öçen dä kötelmägän xäl, anamal' küreneş”,- dip atadı. Soñğı 100 yıl eçendä hawanıñ temperaturası bu qädär tübän töşmägän bulğan.

Nail Alan. Tömän.

XS
SM
MD
LG