Accessibility links

җомга, 9 декабрь 2016, Казан вакыты 08:50

Osama bin Laden AQŞnı yaña höcümnär belän kisätä, kileşü täqdim itä.


Osama bin Laden AQŞqa höcüm itü belän tağı ber märtäbä kisätte. Läkin, ul ber ük vaqıtta Ğıraq häm Afğanistannı torğızu öçen kileşü dä täqdim itkän. Bu xaqta Al Jazeera televideniäsendä tapşırılğan tasmada äytelgän. AQ Yort bu täqdimne kire qaqtı.

Osama bin Laden, prezident Buş administratsiäseneñ, 2001-nçe yılnıñ 11-nçe sintäberennän soñ kürelgän iminlek çaraları Al-Qaedanıñ höcüm mömkinlegen yuqqa çığardı digän raslauların döres tügel dip kire qaqtı, höcümnär planlana dide.

"Amerikadağı oxşaş vaqiğälärneñ kiçekterelüenä sezneñ iminlek çaralar säbäpçe tügel. Operatsiälär Bagdatta bara häm äzerleklär tämamlanğannan soñ, Allahnıñ rizalığı belän sez anı öyegezde kürersez."

AQŞ iminlek agentlıqları bügenge köndä zur qurqınıç kürmilär. Bin Laden üzeneñ çığışında AQŞqa kileşü dä täqdim itkän.

"Bez sezgä ğadel şartlarda ozın möddätle kileşü dä täqdim itäbez. Bez dindarlar, Alah yalğan söylävne yäisä aldaunı tıya. Suğış näticäsndä cimerelgän Ğıraq belän Afğanistanı torğızuğa yardäm öçen ike aq ta iminlek häm totrıqlılıqtan faydalana ala."

Aq Yort suzçese McClellan bu täqdimne kire qaqtı.

"Bez terrorçılar belän satulaşmıybız, alarnı çitlätäbez. Suğışnı terrorçılar başladılar häm prezident suğışnı qayçan häm qayda tuqtatunı üzebez bilgeliäçäkbez dip açıq itep äytte. Amerikan xalqına zian kiterergä tırışqannarnı totıp justitsiägä tapşıru eşen dävam itäbez."

Bin Laden tasmasınıñ qayçan yazılğanı bilgele tügel, Läkin, ul Noyäber azaqlarınnan soñ häm 13-nçe ğinvardan elek yazılğan bulırğa tieş. Çönki bin Laden AQŞnıñ Al Jazeeranıñ Katardağı başkvartirın bombalau niäte turında Britan gazetasında basılğan maqäläne telgä alğan, Läkin, 13-nçe Ğinvarda Afğan çigenä yaqın Pakistan auılınıñ AQŞ tarafınan bombalanuı turında endäşmägän. Şul höcümdä Al Qaedanıñ öç citäkçese hälak buldı dip belderelsä dä, bu äle tulısınça raslanmadı. Pakistannıñ informatsiä ministere Şeyx Raşid Ahmed Pänçeşämbedä yasağan çığışında bolay dide.

"Bayaur höcüme vaqıtında qayber Al Qaeda terrorçılarınıñ hälak bulğanı xaqında mäğlümätebez bar."

Bu höcümdä citäkçel urındağı Al Qaeda ağzaları hälak bulğan xäldä, bu Osama bin Ladenneñ AQŞqa häm Könbatış illärenä yaña höcümnär oyıştıruın qıyınlaştıra ala. Läkin, bu xäbär älegä raslanmadı häm döres bulğan xäldä dä, alarnıñ urnın başqa şäxeslär dä alaala.

Färit İdelle, Praga.
XS
SM
MD
LG