Accessibility links

дүшәмбе, 5 декабрь 2016, Казан вакыты 19:55

Hamid Riza Asefi: İranğa höcüm belän yanap İzrail "xätär xata" yasıy


Iran tışqı eşlär ministrlığınıñ matbuğat wäkile Hamid Riza Asefi, yäkşämbe könne, İzrailneñ Tähranğa qarşı xärbi höcüm belän yanap – "xätär xata" yasıy, dip belderde.

İzrail çınnan da, şimbä könne, İrannı atom programmasın tärräqi itüen kisätep üzeneñ iñ kisken belderülärneñ bersen yasağan ide. İzrailneñ Herzliya şähärendä yasağan çığışında üze İranda tuğan İzrail saqlanu ministrı Şaul Mofaz, İran prezidentın säyäsätne näfrät, terror häm anti-semitizmğa nigezläp qoruda ğäyepläp çıqtı:

"Forsattan faydalanıp İran prezidentı Ähmädinecadqa möräcäğät itäsem kilä. Sez, ilegez belän näfrät, terror häm anti-semitizm ideologiäsendä idärä itäsez. Sez iñ yaxşısı – tarixqa äylänep, sezneñ kebek yähüdlärne yuq itergä tırışqan yulbaşçılarnıñ yazmışlarına qarağız. Alarnıñ şul ğämälläre üz xalıqların yuq itügä kitergän."

İzrail ministrı İranğa qarşı xörbi çara ixtimalı turında açıqtan açıq äytmäde. Ämma Mofaz, İzrail, atom qoralına iä bulğan İranğa ber nindi şartlarda da riza bulmayaçaq, häm ägär dä diplomatik çaralar belän kileşügä ireşep bulmasa – nizaqnı çişer öçen başqa yullar äzerläwe turında belderde.

İran tışqı eşlär ministrlığını matbuğat wäkile Hamid Riza Asefi, İzrail barı tik könbatışnıñ yoğıntısına quşılıp, Tährannı atom programmasın tärräqi itüen buldırmas öçen mondıy belderülär yasıy, dide. Mofaznıñ süzlären, Asefi, psixologik suğış dip bäyäläde, häm inde, äykänemçä, İzrail öçen – İranğa höcüm itüne – "xätär xata" bulır ide, dip atadı.

İrannıñ yäkşämbe könge belderüläre İzrailgä qarşı çığış belän genä çiklänmäde. İran parlamentı räise Ğöläm Ali Hadad-Adel, Fransiä prezidentınıñ uzıp baruçı atnada yasağan belderüen kire qaqtı.

Pänceşämbe könne Fransiä prezidentı Jacques Chirac, Fransiä, üzenä terror belän yanağan illärgä cawap qaytarır öçen üzeneñ atom qoralın qullanu xoquqına iä, dip beldergän ide. Hadad-Adel, Chiracni İran säyäsäten üzenä niçek şulay kürüdä ğäyepläde:

"Könbatış citäkçeläre "terror" süzen üzlärenä niçek kiräk – şulay qullana. Könbatışqa buysınmağan häm üzeneñ bäysez mädäniätenä iä bulğan här il terror häm terrornı yaqlawda ğäyeplänä ala. Fransuzlar xattä möselman qızlarınıñ yawlıq kiyüen dä terrorğa bäyli. Xatın-qızlarnıñ yawlıq bäyläwe – İslamdağı ğädät."

İran şulay uq 2 fivralgä bilgelängän Xalıqara Atom Energiäse İdaräseneñ utırışın da täñqitläp çıqtı, ministrlıqnıñ matbuğat wäkile Asefi, bu cıyınnı – "kiräkmägän säyäsi ğämäl" dip atadı. İran räsmiläre, atom programması mäsäläseneñ BMOnıñ İminlek Şurasına tapşırulu ixtimalına da borçılmawların belderde.

alsu qormaş
XS
SM
MD
LG