Accessibility links

чәршәмбе, 7 декабрь 2016, Казан вакыты 15:37

Yul häläkäte suıqlarğa da qaramıy


Suıqlar kübräk torğan sayın, Tatarstannıñ toraq kommunal xucalıq, sälämätlek saqlaw, sotsial tormış öçen yañadan yaña sınawlar tuyıp tora. Baştaraq, ayaq qullarnı öşetü turındağı ğına süz barsa, xäzer şartlağan torbalar häm özelgän çıbıqlar turında da xäbär itelä.

Soñğı 3 köndä genä, Qazanda 78 keşe ayaq qulların öşetep, tabiplarğa möräcäğät itkän. Çallıda da, distälägän keşeneñ salqınnan zıyan kürüe turındağı xäbär itelä. Ütkän täwlektä genä 2 keşe öşep ülgän. Alar, suqbay bulğan dip xäbär itelä. Salqınnar, xucalıqnıñ başqa yaqlarına da iğtibarnı yünältä. Elektr cılıtqıçlar küp qullanğanğa kürä, Qazanda häm respublikada, elektr köçäneş çamadan tış arta häm saqlaw sistemaları, sünderügä kilä. Qazan häm Çallıda, soñğı waqıtlarda, qısqa waqıtqa utnıñ sünep toru oçraqları yışayğan. Texnik yaqtan imin bulmağan cılıtqıçlar qullanıp yanğınnan yışraq çığa başlağan. Maşinalarnıñ qabınmawı ber bälä bulsa, avtomobilneñ çıbıqları qısqa yalğanışqa kerep, inde berniçä maşina yandı. Saqsız räweştä maşina yörtü, tormozlarnıñ tuñuı, yularnıñ bozlı buluı arqasında, Qazan urtasında ike maşina bärelde häm yanıp kitte.

İñ kürqınıçı, bu könnärdä cılılıqnıñ beterelüe bulır ide. Häm ul kilde, Yuğarı oslan rayonındağı, Qazan häm Yäşel Üzän şähärendäge Tatarstanlılar cılısız qaldı.

Yäşel Üzän şähärendä Kotel’nıyda cihazlar eştän çığu säbäple, yäkşämbe tönendä anda 72 toraq yort, 2 mäktäp, 3 balalar baqçası cılısız qaldı. İrtängä, avariä yuq itelgän, cılı birelgän. Qazanda, qayber iske toraq yortlarda torbalar şartlap, keşelär cılısız utırğan. Barlığı, ber yäkşämbe könne genä, Tatarstanda 13 tapqır cılı häm su belän tä’min itü tuqtap torğan. Avariälär salqınnar säbäple bulğan, dip xäbär itä Gädättän tış xällär ministrlığı.

Qazanda, Çallıda, Älmättä häm başqa şähärlärdä toraq-kommunal xezmätlär gädättägedän kierenkeräk şartlarda eşli.

Yäkşämbe irtäsendä, xökümät binasında häm cawaplı ministrlıqlar qatnaşlığında bulğan cıyılışta, şulay uq salqınnar, häm alar alıp kilgän problemalar turında süz barğan. Xökümät räise Röstäm Miñnexanov, energiäne, gaznı ekonomiäläw yulların, xätta yabıp, sünderep toru öçen binalar isemlegen tözü turında uylarğa çaqırdı.

Bu salqınnar, berençe çiratta, toraq kommunal xucalıqnıñ torışı mäs’äläsen kisken quydı. Kommunal reforma waqıtında, yıllar buyı remontlanmağan toraq yortlar buluı, häm şuña da alarnı keçe biznes qarap torışqa alırğa telämäwe turında äytelep kilä ide. Xäzerge salqın hawalarda ul problemalar kiskenräk räweştä yañğırıy başladı.

Bikä Timerova

XS
SM
MD
LG