Accessibility links

пәнҗешәмбе, 8 декабрь 2016, Казан вакыты 12:59

Yekaterinburda Musa Cälilneñ 100 yıllığın bilgeläw öçen oyıştıru komitetı eşli başladı


Bu könnärdä Sverdlovski ölkäse xökümäte räise Aleksey Vorob'yev Musa Cälilneñ tuuına 100 yıl tuluğa bağışlanğan çaralar uzdıru turındağı qararğa qul quydı. Şul uñaydan Yekaterinburg şähärendä älege çaralarnı uzdıru buyınça tözelgän oyıştıru komitetınıñ berençe utırışı bulıp ütte.

Oyıştıru komitetınıñ räise – Sverdlovski ölkäse mädäniät ministrı Natal'ya Vetrova. 19 keşedän torğan komitet sostavında kürenekle cämäğät eşlekleläre, mädäniät xezmätkärläre, xökümät orğannarı wäkilläre, ğalimnär bar. Biredä tatarlardan Tatarstannıñ Uraldağı daimi wäkile Rawil Bikbov, Ural däwlät konservatoriäse rektorı Şäwkät Ämirov, ölkä Duması räise urınbasarı Nail Şäymärdänov, Mäcit Ğafuri isemendäge tatar-başqort cämğiäte räise Söfxät Nadıyrov, Sverdlovski ölkä tatarları milli-mädäni moxtäriäte räise Mars Şarafulin eşläyäçäk.

-“Musa Cälil – bezneñ öçen böyek tatar şağire genä tügel. Ul kürsätkän batırlıq, qaharmanlıq, anıñ tuğan ilgä bulğan mäxäbbäte, patriotlığı bik küp kiläçäk buınnarğa ürnäk bulıp torırlıq. Şuña kürä bu bäyräm internatsional' bäyräm”, - dip başladı süzen oyıştıru komitetı räise Natal'ya Vetrova. Ölkä xökümäte qararı buyınça, Cälilneñ yöz yıllığın bilgeläp ütüdä ölkäneñ barlıq munitsipal' berämlekläre qatnaşaçaq. Bäyräm qısalarında bik zur çaralar uzdıru qaralğan.

Bügennän ük Ölkä gazetası uquçıları öçen “Üz batırlarıñnı beläseñme?” dip atalğan konkurs-viktorina iğlan itelde. Tatar awılları häm yäkşämbe mäktäplärendä Cälil şiğerlären uqu buyınça bäyge oyıştırılaçaq. Bäygedä ciñüçelär mart ayında uzdırılaçaq zur tantanalı kiçädä çığış yasayaçaq. Ölkä kitapxanäläre bu datağa bağışlap ütkäräse çaralar buyınça köç sınaşaçaq. Şulay uq Yekaterinburg şağirläreneñ tatar cämäğätçelege belän oçraşuı, kitapxanälärdä Cälilgä bağışlanğan törle kürgäzmälär oyıştıru qaralğan.

İñ töp çaralar 10,11 martta oyıştırılaçaq. Bu könnärdä Ural däwlät universitetında Cälilneñ tormış yulına häm icatına bağışlanğan fänni-ğamäli konferensiä häm şähärneñ iñ zur mädäniät saraylarınıñ bersendä tantanalı cıyılış häm zur konsert buluı küzdä totıla. Tantanalı cıyılışta Mäskäwdän, Tatarstannan kilgän zur qunaqlar häm ölkä xökümäte citäkçeläre qatnaşuı kötelä.

Oyıştıru komitetınıñ berençe utırışında inde başqarılğan eşlärgä küzätü yasaldı. Mäcit Ğafuri isemendäge tatar-başqort cämğiäte räise Söfxät Nadıyrov xäbär itüençä, Ural töbägendä çığarıla torğan citdi tirajlı jurnallarnıñ öçesendä, bu yılnıñ berençe sanında Musa Cälilgä bağışlanğan zur materiallar urnaştırıldı. Yekaterinburg şähäre Üzäk poçta bülege Cälil räseme bastırılğan otkrıtkalar, konvertlar çığara başladı.

Utırışta şulay uq tatar cämäğätçelegen küptän borçığan mäs'älälär dä kütärelde. Yekaterinburg şähäreneñ zur uramnarınıñ bersenä Cälil iseme birü mä’säläsen yañadan şähär xakimiäte aldında kütärergä qarar qılındı. Şulay uq Däwlät kinosı fondınnan Musa Cälil turındağı näfis filmnı tabıp, ölkä televideniese kanalında kürsätü, Cälil şiğerläre cıyıntığın öç teldä – tatar, rus, ingliz tellärendä bastırıp çığaru kebek täqdimnär dä qaraldı.

Fäwiä Safiullina, Yekaterinburg.

XS
SM
MD
LG