Accessibility links

якшәмбе, 4 декабрь 2016, Казан вакыты 17:28

Möğallimälär millät ürçetä


İ balalar, balalar… Alardan tora xalıqnıñ kiläçäge. Alarnıñ bäxete, matur itep üsep, täufıyklı ğömer itüe öçen berni jäl tügel. Düşämbe könne Tatarstan premyer ministrı Röstäm Minnexanov Soltangaliev mäydanında rät-rät bulıp tezelgän KAVZ avtobusların 21 rayondağı awıl mäktäplärenä tapşırdı. Bu maşinalarnı alır öçen Tatarstan xökümäte 18 million sum aqça bülgän. Äle federal' üzäk belän kileşep, tağın 228 avtobus awıl mäktäplärenä qaytır dip wäğdä itälär. Şähärgä ekskursiägä, kürşe awılğa qunaqqa barırğa bik caylı bulaçaq.

Bigräk tä qışqı salqınnarda. Menä şuşı avtobuslarğa utırtıp mäktäplärgä uqırğa baraçaq awıl balaları quana. Döres, avtobusqa utırıp uquğa yörergä tieş balalar keçeräk, urta mäktäpsez awıllar da yäşi. İñ yaxşısı – irtän torıp jäyaüläp bulsa da üz awılıñdağı mäktäpkä uqırğa baru. Üz awılıñ perspektivasız sanalıp, kürşe awılğa uqırğa yörü bäxet tügel inde.

Ä nigä yabıla ul mäktäplär digändä, yış qına şul awılda toruçı irlär, xatın-qızlar cawaplı bulıp çığa. Bala tudırmağaç, klasslarda balalar sanı kimi, annan mäktäp qısqara, yabıla, annan soñ awıl üze qorıy. İñ yaxşısı – ürçu, mäktäpne, awılnı, millätne saqlap qalu. Nişläpter näq şuşı ğadi sanalğan ısul qullanılmağanğa, balalar kimi, mäktäplär qısqara, avtobuslarğa utırıp kürşe awılğa cilderü modağa kerä.

Qazan artı awıllarınıñ bersendä demografik afättän qotılu yulın mäktäp direktorı tapqan. Ul bala tabarday uqıtuçı xatın-qızlarğa ğäyre räsmi färman çığarğan – mäktäp, awıl qorımasın disägez daway bala tabığız digän. İñ qızığı şul, tärtip, dissiplina yaratuçı pedagog xanımnar bu burıçnı namus belän ütägän. Radiobıznıñ Qazan studiäsenä kergän Lenar äfände menä şul turıda söyläde.

Ber yılnı böten diärlek uqıtuçılar dekretqa kitep bette. Şulay ber yıl eçendä biologiä, matematika, tarix fäne uqıtuçıları bäbäyle buldı. Zavuçtan tış. Ul ir-at çönki. Ä dekretqa kitkän uqıtuçılar urınına pedagogiä universitetın tämamlap qaytqan elekke uquçılar kilep mäktäptä uqıta başladı. Mäktäp direktorınıñ färmanınnan uqıtuçılar qänäğät qaldı. Çönki şuşı räweşle awıl mäktäbe saqlanıp qaldı. Awıl xalqı tarafınnan da bu ğämäl yaxşı qabul itelde. Kürşe awıllarda yıl sayın 2-3 bala mäktäpne tämamlasa, bezdä - 18-19 bala tämamlıy. Awıl öçen inde bu zur kürsätkeç!

Keçeräyä başlağan awılda balalarnı arttırunıñ, mäktäpne saqlawnıñ aldınğı täcribäsen bezgä citkergän Lenar äfände, üze uqıtuçı bulmasa da, yaqtaşlarınıñ millätpärvärlek başlanğıçın kütärep alırğa qarar birgän.

Rimzil Wäli

XS
SM
MD
LG