Tömän ölkäseneñ könyağına taraluçı “Yañarış” gazetasın aldıruçılar sanı uzğan yılnıñ şuşı waqıtı belän çağıştırğanda yaqınça ber meñgä kimede. Säbäp närsädä soñ?
“Küpçelege ölkännär genä uqi. Yäşlär uqımıy. Xäzer awılda urısça söyläşü modağa kerep bara. Bu modanı äbilärenä cäy köne qunaqqa kilgän onıqları alıp kilä. Awıl balası şähärçä kienergä, şähär balasına oşarğa tırışa şul. Tatar telenä iğtibar mäktäptä kübräk bulırğa tieş. Annan soñ xäzer mädäniät yortlarında da iğtibar yuq. Spektakl'lär quyılmıy. Şulay bulğaç tatar telendäge gazetanıñ da abruyı yuq”,- dip söyli Tömän yanındağı Şıqça awılında yäşäwçe Xämdiä Qızılbayıva. Ul awıldağı milli muzeynıñ başlığı. Anıñ süzlärençä, äle monnan 5-6 yıllar elek kenä awılda bala-çağa urıs telendä söyläşmägän.
Şıqçada “Yañarış” gazetasın 50 läp ğailä aldıra. Awılda 200 yort bar. Yazıluçılarnıñ sanı 50 gä citü dä poçta xezmätkäre Zinnura Axinanıñ tırışlığı. Zinnura xanım “Yañarış” ütkärgän bäygedä 2005 nçe yıl näticäläre buyınça ciñüçe. İñ küp yazdıruçılarnıñ berse.
24 nçe ğinuar könne gazetanıñ redaksiäse çirattağı “Ädäbi Tömän” berläşmäseneñ utırışın ütkärde. Basmanıñ dusların cıyıp alarğa maqtaw käğäzläre, aqçalata büläklär tapşırdı. İñ yaxşı mäqälä yazuçını da, şiğriät ostasın da, iñ küp keşene gazetaga yazdıruçını da bilgeläp üttelär.
Tobol rayonınıñ Sannikova awılında yäşäwçe Nurcihan apa Nazıyrova “Yañarış” nıñ 15 yıllığı uñayınnan divar gazetası çığaruçılarnıñ berse. Ul da bu çarağa kilgän ide. Sannikovada da tatar telendä çığa torğan gazetanı ölkännär genä kötep ala ikän. Nurcihan apanı pensiä yäşe citkängä mäktäptän kitergä mäcbür itkännär. “Yañarış” yärdäme belän çığarğan stengazetaları xäzer isä istälek kenä bulıp qalğan.
“Ädäbi Tömän” utırışına kilgännär gazetanıñ sanın arttıru öçen täqdim belän çıqqannar. Suğış veterannarın ölkä xakimiäte yazdırmas mikän dip ömetlänälär. Tağın “Yañarış”nıñ 15 yıl buyı baş möxärrire bulıp eşlägän Azat Sägitov premiäsenä iñ yaxşı yazmağa bäyge dä iğlan ittelär
Tömän ölkäseneñ könyağına taraluçı “Yañarış” gazetasın bügenge köndä 3050 keşe aldıra. Uzğan yıl yazdıruçılar sanı 4 meñgä yaqın bulğan.
Nail Alan. Tömän.
