Accessibility links

пәнҗешәмбе, 8 декабрь 2016, Казан вакыты 05:19

Samar milli xäräkäteneñ börkete


Samar milli xäräkäteneñ börkete bulğan Xäyrulla uğlı Rawil abzıy Yahudinnıñ xäläl cefete Rawza apa belän bergä torularına 50 yıl bula. Şul uñay belän milli xäräkät citäkçeläre bu olpat irne häm anıñ xatının tübändäge süzlär belän täbriklilär:

“ Samar töbägendä dinebez islamğa xezmät itüçelär ğömer- ğömergä buldılar. Şul uq waqıtta milli mädäniätkä ğömerlären bağışlağannar buluı da bezlärne quandıra. Ä menä ayırım şäxeslär bu ike yökne beryulı kütärep baruları belän ayırılıp toralar. Şundıylarnıñ berse- Xäyrulla uğlı Rawil abıy Yahudin. Rawil abıyıbız şunısı belän bezgä qäderle ki, ul dinebez islamnı häm tatar mädäniäten qoşnıñ ike qanatıday yaqın kürä. Ul şulqädär ixlaslı, märxämätle, miherbanlı tatar canlı olpat irebez ki, anıñ küñele yarsız diñgezne xäterlätä. Rawil Yahudinnıñ yöräk türenä dinebez islam da, mädäniättä sıya häm bu sıyfatlar iñ zıyalılarğa ğına xas. Tormışını tirän añlap, sänğät'ne yaratıp, dinebez islam taläplären cirdä mäğnäle yäşäw öçen şart itep quyğan Rawil Yahudin härwaqıt şäxsi bocralarına biklänmiçä millät ofığın küzdä totıp eş itä.

Xäyrulla uğlı Rawil Yahudin ğömerenä dönya qudı. Läkin dä anıñ dönyası şäxsi qoymaları belän çiklänmiçä, tuğan- tumaçaları itep barlıq tatarlarnı, möselmannarnı dus itep kürüdä buldı.

Äye, törle ideologiä tatarnı törleçä izä, boza, xättä yuq itä. Bik köçle adämnär genä sotsializm, kommunizm, kapitalizmda da çın tatar bulıp qala alalar. Monıñ öçen ğailädä töple, tatar ğöref- ğädätlären señderep tärbiä alu zaruri, äle menä şul nigez qaqşamasın öçen, yeget wä qız tormış qorğanda üzeneñ xäläle itep dinebez islam äxlağı alğan par belän tormışın bäylärgä tieş. Monıñ öçen yäşlär hiçşiksez ata- ana, äbi- babay kiñäşlären küzdän ıçqındırmasqa tieşlär. Rawil häm Rawza näq menä şul täğlimätqa nigezlänep, ğailä qoralar häm alar ber- bersenä turı kilgänleklärenä quanıp yäşilär. Rawil abıy belän Rawza apanıñ mäxäbbätläre soqlanırlıq ta, ürnäk alırlıq ta. Rawile ir, xuca, mal taba belüçe, nazlı itüçe xatın bulıp yäşi aluçı, mäñge Rawil abıyğa ğına ğaşıyq tatar xatını, ä Rawile xatınına, balalarına tuğrılıqlı ir bulıp yäşäde.

Rawil häm Rawza Yahudinnar yortı härwaqıt qunaqçılıqları belän ayırılıp tora. Biredä yaqtı yöz, yomşaq möğallämä xökem sörä. Rawil abıy belän Rawza apalarnıñ ğömer kiçerüe bezlärgä möselmança yäşäyeşneñ bizmäne bulıp tora. Rawil abıynıñ iñ osta kiñäşçe buluın istä totıp berençe Bötendönya tatar kongressında uq Başqarma komitetı äğzası itep saylanuı barçabız öçen dä däräcä, ä Rawil abıy tatar dönyasında ber äwliälıq bilgese.

Yahudinnar näselendäge tantana Samar tatarlarınıñ da quanıçına äwerelüe, bu ike şäxesneñ millätpärvarlar bieklegenä kütärelüeneñ iñ yuğarı bäyäse dip qabul itelä. Qäderle wä xörmätle Rawil abzıy häm Rawza apabız! Bez Sezneñ belän ğorurlanabız häm Täñrebezdän Sezlärgä ike dönyanıñ räxäten telibez.”

Samar milli xäräkätendä 17 yıl buyına eşläp kilüçe , 17 yıl buyına Samarda tatar telendäge radiotapşırularnı alıp baruçı Nailä xanım Sabircanova Rawil abıy Yahudin turında bolay di:

“ Min Rawil abıy Yahudin turında bik ozaq söyli alam, çönki 17 yıl buyına anıñ eşçänlege minem küz aldında buldı. Şuña iğtibar itärgä kiräk. Ägärdä bügen milli bäyrämnärgä distälärçä baylarıbız aqçalata yärdäm itsä, berençe Sabantuylarda bik az sponsorlar arasında Rawil abıy Yahudin berençe ide. Rawil abıy mäscedlär salğanda zur matdi yärdäm kürsätkän keşe, ä inde Samar Cämiğ mäscedeneñ nigez taşların salğanda, sazlıqqa timer- beton bağanalar qaqqanda, ul başlap yörde, yılda Sabantuylarğa küpläp büläklär alıp kilä ide, bik küp artistlarnı qunaq itkän keşe ul. Şunısı da maqtawğa layıq. Rawil abıy Yahudin sotsializm waqıtında uq namazlıqqa basqan ir häm ul här ğämälen Qor’än taläplärennän çığıp eşli. Ä inde anıñ xatını Rawza apağa bulğan mönäsäbäte soqlanırlıq.

Rawil abıy Rawza apanı bügen dä yegetlärçä yarata. Soqlanğıç keşe ul Rawil abıyıbız. Milli xäräkättä yäşlärgä härwaqıt ürnäk bulıp kilde häm qaldı.”

Şamil Bahautdin, Samar.

XS
SM
MD
LG