Accessibility links

җомга, 9 декабрь 2016, Казан вакыты 00:58

“Atalar belän balalar” cır saylıy


“Üzebez” yaña buın xäräkäte aktual', bäxäsle temalarğa söyläşülär ütkärüen däwam itä. Şuşı könnärdä tatar cırı, moñı, estradası turında bäxäs quptardılar. Döresräge ölkän buın cırçıları belän yaña buın yäşläre ber-bersen añlarğa tırıştı. Lev Tolstoynıñ “Atalar häm balalar” romanınıñ däwamı diäsen. Sovet zamanında tärbiälängän apalar-abıylar tege ğasırda niçek tatar cırların cırlağannar şulay bulırğa tieş häm tağın ber qat tieş dip söyläsälär, yaña buın yäşläre alarğa 21 ğasırnıñ taläplären, yäş buınnıñ nindi cırlarnı tıñlayaçağın äyttelär. “Tatar radiosı”, “Bars Media” oyışması xaqında süzlär yış yañğırasa da alardan ber genä wäkil dä yuq ide. Ä söyläşne başlap cibärüçelär häm kiräkle yaqqa boruçılar xalıq artistı Gölzadä Safiullina häm “Üzebez” yaña buın bäräkäteneñ koordinatorlarınıñ berse Rezidä Safiullina buldı. Oçraşuda Sirinä Latıypova, Asia Yunısova, Şämsiä Cihangirova kebek tanılğan jurnalistlar, şağirä Näcibä Safina, Miñğol Galiev kebek tatar köeneñ serlärenä öyrätüçe uqıtuçı, Georgiy İbuşev kebek tanılğan xalıq cırçısı belän bergä, mädäniät ministrınıñ da wäkile, psixolog, tatar kongressınnan Färit Urazayıwlar bar ide. Yaña ğına tatarça xip-xop cırlıy başlağan “İttifaq” törkemeneñ muzıykal' çığışı bäxäsne tağın da quyırtıp cibärde. Çönki sovet çorında tärbiälängän buınğa bu törkem yat ide, ä yäşlärgä kiresençä. - Köylär tıñlağanda qaysı tatarnıqı, qaysı tatarnıqı tuğellekne ayırırğa öyränsäk yegetlärneñ dä köylären häm süzlären ikegä ayırsaq. Şul waqıt bez ber äyberne açıqlarbız, köy bit bezneke tügel… (Cүзгә yäşlär quşıla) - Sez üzegez bezdän sez tatar klassikasın işetkänegez barmı dip sorıysız. Bezneñ sezdän şunı sorarıysıbız kilä, ä sezneñ arzanlı tatar popçasınnan başqanı işetkänegez barmı: rok, rep?.. Söyläşü qızğannan qıza bardı, xätta ölkännär yäşlärne basıp ta kittelär kebek, yäşlär barıber üz fikerlärendä qaldılar. Gergi İbuşev al’ternativ tatar köe turında süz kitkäç rizasızlığın belderde aña yaña buın wäkile İl'şat Gıymadiev qarşı töşte: - Al'ternativ cır turında işetkäç minem böten canım, yörägem urınınnan töşep kitte. Dimäk bezneñ yäşlärebezgä ışanıçıbız yuq digän fiker tudı mindä. Cırnıñ tamırınnan ayırılabız ikän bezneñ millät bette digän süz. Bügen ük inde yäşlär rätläp tatarça söyläşä belmilär. Oçraşuğa kilgändä ike yeget rusça söyläşep kildelär, artlarınnan kildem, ruslar dip toram min alarnı. (İl'şat quşıldı) - Georgiy abıy citär sezgä! Beläbez, tatarça bik äybät söyläşä beläbez. Duslarım belän nindi teldä söyläşüemä sezneñ eşegez bulmasın!!! Bäxäsläşüdä “7 yoldız” kebek televizion proyektlar, “Bars Media” çığarğan cırçılar turında süz kitkäç “Üzebez” yaña buın xäräkäte wäkilläre yaña täqdim belän çıqtı: - Äydägez “Üzebez”neñ köyle xit-paradın buldırabız. İñ naçar, moñsız cır ürnäge häm äybät cır ürnäklärenä nominatsiälär bilgeläp ber çara ütkärsäk, bälki närsägä bulsa da ireşerbez?! Tatar moñı, cırı, cırçıları turında ğapläşü 4 säğättän artıp kitte. Sallı ğına fikerlär yañğıradı läkin bu temağa ğapläşü tögällänmäde. Röstäm İsxaqi

XS
SM
MD
LG