Accessibility links

якшәмбе, 11 декабрь 2016, Казан вакыты 09:17

Başqortstan xökümäte utırışı ütte


Başqortstanda bıyıl Rusiädä tormışqa aşırıla başlawçı milli proyektlar xökümät däräcäsendä nıqlap tikşerelä başladı. Başqortstan Ministrlar kabinetında ütkän çirattağı kiñäytelgän utırışta näq menä şul proyektlarnı ğämälgä aşıra başlaw mäsäläläre tikşerelde. Utırışnı açıp, xökümät başlığı Rafael Baydäwlätov Rusiä prezidentı tarafınnan täqdim itelgän proyektlarnı ütäw öçen Başqortstanda hämmä mömkinleklär dä buluın äytte. “Sawlıq saqlaw, mäğärif, toraq tözeleşe tarmaqlarında da, başqa yünäleşlärdä dä Başqortstan aldağı berniçä yıl eçendä küp eşlär başqara ala, - di Rafael Baydäwlätov. – Monıñ öçen respublikata tieşle iqtisadıy baza citärlek. Barı tik här ölkädä cawaplı citäkçelärneñ üz eşlärenä citdi qarawı ğına kiräk”.

Xökümät başlığı çığışınnan soñ, respublikanıñ qayber ministrları da süz aldı häm üz eşçänlek dairäse ölkälärendä kön üzägendä torğan mäsälälär buyınça täqdimnären äytte. Sälamätlek saqlaw ministrlığı, Mäğärif ministrlığı, tözeleş ministrlığı citäkçeläre aldağı ike-öç yılda başqarılası eşlär xaqında söyläp bu yünäleşlärdä küpme çığımnar taläp itelüen dä täğayın sannarda äytte.

Utırışqa yomğaqnı premer-ministr Rafael Baydäwlätov yasadı. Qayber çığış yasawçılarnıñ tege yäki bu fikerläre belän kileşüen, ä qaysıdır täqdimnären xuplamawın belderde ul. Ayıruça respublikanıñ tözeleş ministrlığı eşçänlegenä qänägätsezlegen belderde Xökümät başlığı.

Başqortstan xökümäte başlığınıñ respublikatağı tözeleş tarmağı eşçänlegenä tiskäre bäyäse moñarçı da işetelä ide. Soñğı yıllarda Başqortstanda tözeleş eşläre şaqtıy kimüe kiñ bilgele faqt. Ayıruça toraq yortlar tözü yünäleşendä eşlär xört. Ufanı ğına alğanda da, biredä kübräk bik zatlı yortlar ğına tözelä. Alarnı kesäse qalın bulğannar ğına alala. Ä inde buşqa fatirlar birü ğädäte bötenläy dä beterelde. Buşqa fatirnı zur türälär genä ala xäzer. Oçsızraq dip tözelgän yortlarnıñ da bäyäse yaqın kilerlek tügel. Monı xökümät başlığı üze dä tanıy. Ufada yaña yortlardağı toraq bäyäläre Tatarstan başqalası Qazandağı bäyälär belän çağıştırsañ, 35-40 protsentqa qıymmäträk kilep çığa ikän. İpoteqa buyınça fatirlar alu tärtibe dä yaxşılap eşlänmägän. Bu yul belän fatir alu da küp xalıq öçen xäl citmäslek eş. Menä şuşı yünäleşlärdä ilneñ qayber töbäklärendäge aldınğı täcribäne öyränü kiräklegen assızıqladı Rafael Baydäwlätov.

XS
SM
MD
LG