Accessibility links

сишәмбе, 6 декабрь 2016, Казан вакыты 11:24

Ufa mäçetlärendä zäm-zäm comğası


Uzğan atnada Başqortstan xacilarınıñ bıyılğı İzge säfärdän isän-saw äylänep qaytuları xaqında xäbär itkän idek. Bıyıl Başqortstannan Sögüd Ğäräbstanına izge säfärgä cämğıse 200gä yaqın keşe bardı. 27 ğinwar könne Ufadağı mäçetlärdä “Zäm-zäm comğası” dip atalğan çaralar ütte. Anda bıyıl häm ütkän yıllarda izge Xac säfärendä yörep qaytqan din qardäşlär kilgän ide. Bergäläp comğa namazın uqığannan soñ, xacilar izge säfärdän alıp qaytqan zäm-zäm sularınnan awız itte, mäçetlärgä kilüçe hämmä keşene dä sıyladı.

“İxlas” mäçetendä ütkän “Zäm-zäm comğası” mäclesenä dä yözlärçä keşe kilgän ide. Anda da bıyıl Xacğa barğannar da, uzğan yıllarda anda bulğannar da kilde. Härberse üzläreneñ şuşı säfärdän alğan täessoratları belän urtaqlaşa, yulda häm Mäkkä belän Mädinä şähärlärendä bulğan xällär xaqında söyli. “İxlas” mäçete bulışlığı belän oyıştırılğan Xac säfärenä bıyıl qırıqqa yaqın keşe barğan ide. Alar arasında Ufada yäşäwçe Ğabdelbarıy xäzrät Bayqov belän Wäsilä abıstay da bar. Dingä niçek kilüläre häm Xac säfärläre xaqında alar “Azatlıq” radiosına söyläde.

“İxlas” mäçetendä cıyıluçılar, bergäläp comğa namazın uqığannan soñ, çäy mäclesenä cıyıldı. Anda hämmä keşe – Xacğa barğannarı da, bara almağannar da ozın yullar aşa Ufağa qaytıp citkän şifalı, sixätle zäm-zäm suınnan awız itä aldı.

XS
SM
MD
LG