Accessibility links

шимбә, 10 декабрь 2016, Казан вакыты 00:18

Saddam mäxkämäsendä çirattağı utırış cancal belän tämamlandı


Saddam mäxkämäsendä ber ayğa suzılğan tänäfestän soñ, bügenge utırışnı yaña xäkim – Räüf Äbdel-Raxman alıp bardı. Elekkese – çığışı belän şulay uq körd bulğan Rizğar Möxämmät Ämin – Saddam häm anıñ 7 tarafdarına qarata artıq yomşaq buluda ğäyeplänep çitlätelgän ide.

Yaña xäkim berençe minutlardan qırıs tärtip urınaştıraçağın kürsätte, xäkim isemenä kimsetülär, säyäsi şiğärlär qıçqıruğa yul quymayaçağın belderde. Ğäyeplänüçelärneñ berse – Saddamnıñ elekke Küzläw başlığı İbrahim Barzan Äl-Tiqriti xäkimne "fähişä qızı" dip atağaç, xäkim saqçılarğa anı quıp çığarırğa quştı.

Moña protest yözennän Saddamnıñ advokatlarıı utırış bülmäsen taşlap çığıp kitte. Xäkim alarğa "sez başqa kertelmäyäçäksez" dide, häm yaña advokatlar bilgeläde.

Şunnan soñ Saddam da torıp-basıp, bülmädän çığıp kitü röxsäten soradı. Östäwenä "Satlıq cannar olağığız! Amerika olaq!" dip qıçqırdı. Xäkim bu süzlär öçen ğafu ütenergä taläp itte, yuq isä anıñ berqaya da çığarmayaçağın äytte. Saqçılar Saddamnı köçläp urınına utırttı. Saddam belän xäkim arasında süz köräşterü başlandı:

Xäkim: - Bez qanun qısalarında eş itäbez. Saddam: - Yuq äfändem, sez qanunnı cirgä salıp taptıysız.

Şuşı ğawğadan soñ xäkim Saddamnı da mäxkämä bülmäsennän çığarırğa quştı.

Saddam häm anıñ tarafdarları eleke utırışlarda da säyäsi şiğärlär qıçqıra ide. Moña qarşı tora almağan elekke xäkim Rizğar Möxämmät Ämin wazifasınnan çitlätelep, yaña xäkim bilgelände.

Äytkändäy, Räüf Äbdel-Raxman da çığışı belän körd, Halacba qalasında tuğan. 1988 yılda bu töbäktä Saddam ğäskärläre 5 meñläp kördne gaz belän ağulap ütergän sanala. Qorbannar arasında yaña xäkimneñ tuğanarı da bulğan. Bu uñaydan qayber tänqitçelär, yaña xäkim döres saylanmağan digän fiker belderä.

Berniçä ğäyeplänüçe häm advokatlar çığıp kitkännän soñ utırış däwam itte. Kitkän advokatlar urınına xäkim yañaların bilgeläde. Şahitlär 1982 yılda Dujail awılında bulğan xällärgä tanıqlıq ittelär.

1982 yılda bu awılda Saddamnı üterü tırışlığınnan soñ, xökümät köçläre awılnıñ astın öskä kitergän. Saddam häm anıñ 7 tarafdarı şuşı awılda 148 şiğineñ üterelüe öçen ğäyeplänä.

Mäxkämäneñ kiläse utırışı kiläse atnada, çärşämbe yä atnakiç ütäçäk.

ali ğilmi
XS
SM
MD
LG