Accessibility links

Rinat Zakirov: Tatar köräşe federatsiäse millätebezneñ kiläçägen qayğırta


Bötenrusiä tatarça köräş federatsiäsen oyıştıru eşläre uzğan yılda uq başlanğan. Bu uñaydan tatarça köräşkä bağışlanğan konferensiä ütte häm soñraq oyışma räsmi räweştä terkälde. Tatarça köräş federatsiäseneñ oyıştıruçısı häm anıñ eşçänlegen ğämälgä quyuçı Bötendönya tatar kongressı bulıp tora. Bügen federatsiäneñ eşçänlege töbäklärdä cayğa salınıp kilä. Rusiädä, başqa illärdä eşläp kilüçe kongressnıñ 340tan artıq oyışması şuşı eşkä cälep itelä. Sabantuylar uzğan töbäklärdä milli köräş federatsiäseneñ bülekçäläre, köräşçelär klubları, balalar öçen seksiälär açıla. Yaña oyışmanıñ maqsatı häm anıñ eşçänlege xaqında Bötendönya tatar kongressı räise Rinat Zakirov söyli:

Milli köräş tatar xalqı köräşeneñ barlıq atributların saqlawğa nigezlängän. Xalqıbıznıñ töp bäyräme Sabantuy ilneñ 59 töbägendä zurlap ütkärelä. Sabantuynıñ bizäge bulğan tatar köräşen tieşleçä uzdıru bügen bezneñ yärdämgä moxtac. Şuña da milli köräş yuğalıp barğan töbäklärdä köräşçelärne, kiräkle şartlarnı, alımnarnı buldırırğa kiräk. Bez bu eşne Tatarstanda inde küptännän eşläp kilüçe tatar-başqort köräşe federatsiäse belän berlektä uzdırabız.

Ä köräşneñ töp maqsatı turında Rinat Zakirov menä närsä äytte:

Köräş kenä tügel, iñ äwwäl ilneñ törle töbäklärendä yäşäwçe millättäşlärebezneñ tärbiä sistemasına yoğıntı yasaw da bezneñ maqsat bulıp tora. Çönki milli köräş belän şöğellänüçe yegetlärebez turı yuldan berqayçan da taypılmaslar dip uylıybız. Tatarça köräş federatsiäse millätebezne saqlaw, anıñ kiläçägen buldıruğa bağışlanğan.

Al'bina Zäynulla



XS
SM
MD
LG