Accessibility links

Кайнар хәбәр

Britaniä İrannan atom yöklämälären ütäwne taläp itä


Britaniä İran üzeneñ atom programması turındağı taläplärdän citkä taypılmasqa yäki xalıqara cämäğätçelekkä yanamasqa tieş dip kisätte. Bu kisätüne Britaniä tışqı eşlär ministrı Jack Straw bügen Londonda İran tışqı eşlär ministrı Manucir Mottaqi belän oçraşuda citkerde. Oçraşu aldınnan Straw xalıqara cämäğätçelek İranğa üzeneñ atom yöklämälären ütäw öçen soñğı mömkinlek birde dide. İran prezidentı Mäxmüt Äxmädinicat İran Könbatış basımına bireşmäyäçäk häm üzeneñ atom programmasın tormışqa aşıraçaq dide. "Min ul yalğan häm xıyalıy östen köçlärgä şunı äytäm, sez İran däwläteneñ 27 yıl elek bäysezlek aluın belergä tieşsez. Bez İran xalqınıñ atom energiäsenä xoquqı bar dip isäplibez häm xalıq xezmätçeläre bularaq bez bu xoquqqa tulısınça ireşkänçegä qädär tırışaçaqbız" dide Äxmädinicat. Atom söyläşülärendä İran törkemen citäkläwçe Ali Laricani bügen tağın ber märtäbä Tähran uran bayıtuğa nıqlap kereşäçäk häm üzeneñ atom qorılmalarında BMO tikşerülären tuqtataçaq dip yanadı. Düşämbe könne BMO İminlek Şurasınıñ 5 daimi äğzası BMOnıñ xalıqara atom energiä idaräse İrannıñ atom programması mäs'äläse turında Şurağa xäbär itärgä tieş dip kileşte. Şurada isä İranğa qarata çikläwlär mäs'äläse qaralırğa mömkin. Atom energiä idarä şurası Venada irtägä cıyılaçaq.
XS
SM
MD
LG