Accessibility links

якшәмбе, 4 декабрь 2016, Казан вакыты 07:07

Bush belän Putinnıñ çığışların çağıştırıp bulamı?


Amerikan häm Rusiä prezidentlarınıñ yıllıq xisapları bıyıl ber waqıtqa turı kilde. Bush kongressta çığış yasasa, Putin Kremldä jurnalistlar aldında cawap tottı. İkese dä uzğan yılğa näticä yasadı, kiläçäkkä ürlär bilgeläde..

Bu ike il citäkçeläreneñ çığışların çağıştıru Salqın suğış çorına xas ide. Ul çaqta Mäskäw dönyağa kommunizm taratıp, Washington – monı tıyarğa tırışsa, xäzer taraflar urınnarın alıştı diergä bula. Bush, dönyağa demokratiä taratu säyäsäten däwam itergä öndäsä, Putin, bezgä revolutsiä tügel, evolutsiä kiräk, dip bulğannı saqlarğa çaqıra.

Äytik, Ändicandağı qanlı waqiğalardan soñ Rusiä Üzbäkstan citäkçeläre belän yaqın mönäsäbät totırğa tieşme digän sorawğa "Bezgä Üzäk Aziädä ikençe Äfğanstan kiräk tügel, revolutsiä tügel, evolutsiä kiräk, Ändican waqiğalarınıñ qabatlanuı kiräk tügel" dide Putin.

Könbatışnıñ eçen poşırğan tağın ber citäkçe - Belarus prezidentı Aleksandr Lukaşenka belän tığız mönäsäbätlär totunı da Putin yaqlap çıqtı. "Rusiä belän Belarus arasındağı mönäsäbätlär ğasırlar buyına tözelep kilgän, alarnı Belarus belän Fransiä arasındağı mönäsäbätlär belän berniçek tä çağıştırıp bulmıy, zinhar monı onıtmağız," di Rusiä prezidentı.

Bush üzeneñ äwzem tışqı säyäsäten, şul isäptän, terrorğa qarşı suğışnı, dönyağa demokratiä taratını däwam itäçägen belderde. Ğärçä, bu säyäsätneñ qayber öleşlären, ayırım alğanda, Ğiraq suğışın amerikannarnıñ kübese xuplamıy. Bush fikerençä, Amerika üzenä biklänsä, ul zäğifräk häm iminsezräk kenä bulaçaq. "Şuşı qatlawlı çorda izolatsiä yulı qulay bulıp toyılırğa mömkin, çınlıqta ul qurqınıç. Xalqıbıznı saqlaw, yazmışıbızğa xuja bulu öçen ber genä yul bar – äydäman bulu. Quşma Ştatlar bu yulın däwam itäçäk, di Amerikan prezidentı.

Bush çığışında Äfğanstan, Ğiraqnı telgä aldı, häm dä İranğa tuqtaldı. "Xäzer İran üz xalqın ezärleklägän ruxanilar törkeme qulında. Bu rejim Fälästin häm Livandağı terrorçılarğa yärdäm itä, monı tuqtatırğa kiräk," di Amerikan prezidentı.

Salqın suğış çorınnan ayırmalı bularaq, xäzer Rusiä aldınğı illär belän yarışa almasa da, Putin qoral çağıştırudan totılıp qala almadı. Zur qänäğätlänü xise belän Rusiäneñ zamança raketaları turında söylägändä ul, niçek yomşağraq itep äytergä, alar amerikanıñ Raketa qalqanına qarşı tügel, läkin ul qalqan barmı-yuqmı, bezneñ raketalarğa barıber, dide.

Eçke mäsälälärgä kilgändä, citäkçeneñ ikese dä energetikağa basım yasadı. Bush Yaqın könçığış neftennnän bäylelekne kimetü öçen, energiäne saqlap totarğa çaqırdı. Putin gaznı Ukrainağa bazar bäyäsenä sata başlawnı qazanış dip atadı. Bush Amerikanıñ iqtisadi östenlegen saqlarğa öndäde. Putin, Amerikanı, Rusiägä Dönya Säwdä Oyışmasına kerüdä ayaq çaluda ğäyepläde.

Bushnıñ çığışı räsmiräk yañğırasa, Putin, bigräk tä turı translatsiä tuqtatılğannan soñ, irekle söyläm telenä küçte. "Bez gaz bäyälären borınnan qazıp çığarmıybız", "Yarıy, tämamlarğa waqıt, pamperslar kiep kilmädek", "Rusiäneñ bar sarı çäçle qızlarına säläm" kebek süzlär äytte. Ä inde, qayber Könbatış säyäsätçeläreneñ Rusiäneñ Zur 8-lekkä kerüenä şik belderüe turındağı sorawğa, Putin, üzenä xas räweştä, andıy keşelärgä tökerep qararğa kiñäş itte.

Ali Gilmi
XS
SM
MD
LG