Accessibility links

җомга, 9 декабрь 2016, Казан вакыты 06:52

Tatarstan kügen Boeing belän Tu-214 büleşä


Urıslar berençe çiratta oçqıç, annarı ğına qızlar dip cırlıylar. Ä bit kem arbasına utırasıñ digändäy, kem yasağan оçqıç belän oçasıñ bit. Ul caylı häm ışanıçlı oçqıç bulğanda ğına şul qızlar turında uylap bula. Ä rusiä oçqıçında oçqanda şul oçqıç turısında uylasañ ğına. Bit, soñğı yıllarda rusiädä citeşterelgän samoletlarnıñ äle tanzaniädä, äle İordaniädä yığılıp töşkänen yış söylilär. Cimerelä inde, Rusiä oçqıçları.

Tatarstan aviakompaniäsendä şulay itep, üzendä citeşterelä torğan oçqıçlarnı tügel, ä Quşma ştatlarnıqın satıp alırğa cıyına. Samolet ul küktä oçqanda ğına keçkenä kürenä. Ällä ni isebez kitmi. Ä menä anıñ bäyäse- başnı qaşırlıq. Mäsälän älege dä bayağı Boeing oçqıçı 45 million tiräse tora. Ä Tatarstan şirkäte ni öçen soñ çit il oçqıçın ala. Säbäp ike-ikeñ dürt kebek bik ğadi. Şirkätneñ general' direktorı Möxämmät Zäkärcaev Britaniäneñ ber konsalting kompaniäse belän xezmättäşlek itä başlarğa cıyına. Älege Britaniä kompaniäse Tatarstanğa un Boeing häm Airbus samoletları alırğa yärdäm itä. Döres, bu samolet parkın yañartu 5-6 yıl däwam itäçäk. Tatarstanda citeşterelgän samoletlar alırğa da bula di direktor. Läkin, aqça yuq. Tatarstan xökümätenä, yärdäm itegez dip möräcäğät itkän bulğannar. Aqça tabılmağan. Iştu, sin, süz bit distä million dollarlar turında bara. Ber xökümät, ällä Rusiäneñ eşsezlektän aptırağan töbäklären aşatır öçen millionlağan salımnar tüläp torsın, ällä samolet alsın. Töpsez tügel bit. Monısı inde xökümätneñ cawabı bulğan. Nu şundıyraq mäğnädä. Ä tege investorlar, aqçaları da bar üzläreneñ, läkin, alar Qazanda yasalğan oçqıçlarğa qarağanda, çit illärneken ışanıçlıraq kürgännär. Ägär, bu samolet alularğa kitkän aqçanıñ, ul oçqıçlarnı yörtüçelärne yañadan öyrätü, ekspluatatsiä kebek eşlärgä kitkän aqçanı sanasañ, is-aqıllarıñ kitär. Älege dä bayağı, oçqıçlarnı ekspluatatsiägä äzerläw genä dä 7 dän un million dollarğa töşüe ixtimal.

Döres, Qazanda yasala torğan samoletlar belän dä bolay uq xäl naçar tügel. KAPO dip atalğan samoletlar tözü şirkätendä mäsälän, 2008 yılğa qädär Transaero aviakompaniäsenä un TU-214 samoletın yasap, satarğa tieş. Bu yılda dürtese äzer bulaçaq inde, oçqıçlarnıñ. Bu un samolet bäyäse 600 million dollar tora. Tik yatmıy.

Bu könnärdä, KAPOda Tatarstan premyerı Röstäm Miñlexanov qararı belän oyışqan tikşerü komissiäse eşli. Menä, samoletlar tözü könnän kön bäyärä bara ikän. Miñlexanov şuşı bäyälär kütärelüneñ säbäplären açıqlarğa quşqan. Menä küz aldına kiteregez, ber şirkät, samolet yasarğa zakaz birä. Monnan tış, aqçasın da tüläp quya. Ul tülägän aqça, bäyälär kütärelgängä, samoletnı yasap beterergä citmi. Miñlexanovnı bu aptıratqan. Nik bäyälär kütärelä. Yüri kütärälärme, ällä, başqa säbäplär barmı. Menä komissiä tikşerä inde xäzer. Niçek kenä bulmasın, yaxşımı, naçarmı, respublikada samoletlar yasaw däwam itä. Bit, rusiäneñ qayber töbäklärendä, samolet yasaw eşläre bik xörti bara bit. Ulyannıñ samolet zavodında mäsälän şundıy xäl. Monnan tış, küp kenä problemalar buluğa qaramastan, respublikada, boralaq- vertolet yasaw da tuqtalıp qalmadı. Yasaw ber xäl, alarnıñ remontlap toru da bit şaqtıy zur fayda kiterä torğan äyber. Vertolet zavodında mäsälän, törkiäneñ distälägän boralağı bügenge köndä tözekländerelep yata. Döres, zavod citäkçeläre, aqçağa zarlana anısı. Az dilär. Ä kemdä ul xäzer küp. İñ möhime, eş bit bara.

Yomğaqlap äytkändä, respublika da Boeing samoletları belän oça başlasalar da, Tatarstanda citeşterelgäne dä äle bazardan kitärgä cıyınmıy. Eşläp kilä.

Räfis Cämdixan.

XS
SM
MD
LG