Accessibility links

дүшәмбе, 5 декабрь 2016, Казан вакыты 01:27

Semberlelär Salawatnıñ soñğı konsertı tirän mäğnäle buldı di


Fevral'neñ 2 sendä Lenin Memorial' üzägeneñ 1500 keşe sıyarlıq zur zalında Salawat konsertı zur uñış belän uzdı. Härwaqıttağıça, zal tulı ide. Tamaşaçı fikerençä, Salawat citdilängän, milli tamırlarıbızğa kübräk iğtibar birä başlağan. Elekke olpat cırçılarıbıznı ekranda kürsätep, alarnıñ repertuarınnan cırlar başqaruı bigräk tä cılı qabul itelde. İlham Şakirovnıñ “Açulanma” cırı yänäşädä utırğan yäş kenä xanımnıñ küz yäşlärenä dä säbäp buldı. Salawatnıñ tarixi tamırlarıbıznı da barlawın izge ğämäl dip sanarğa kiräkter. Oluğ şaw-şular belän başlanıp, pısqıp qına alğan “İsä Bolğar cilläre” kinofil'mı urınına üz repertuarına “Ätil suı aqa torur”kertüe, şulay uq Aq büregä bağışlanğan çığışı ayıruça tä'sirle buldı. Bürene etkä äyländerergä bik tırışsalar da, büre bulıp qaluıbızğa inandırunıñ izge ğämäl dip tä sanarğa buladır. Tamaşaçınıñ fikere ber: Salawatqa oluğ räxmätlär!

Xäyer, monısı yañalıq tügelder inde. Şunlıqtan bügen süzebez dä başqa närsä turında.

Ğäliäsğar Kamal teatrınıñ administratorı İnsaf Xämitevkä kamallılarnıñ Sembergä bik tä siräk kilüenä üpkä belderergä turı kilgän ide berwaqıt. “Ul'yan tatarları teatrğa az yöri, alarğa tegendi-mondıy konsertlar ğına kiräk”, digän ide ul. Ni äytsäñ dä, İnsaf süzlärendä xaqlıq ta yuq tügel: teatr zalları tulı bula dip äytü bik qıyın. Küp oçraqta yartılaş qına bula.

Monıñ säbäbe närsädä soñ? Salawat konsertı başlanğançı häm tänäfes waqıtında şuşı sorawğa cawaplar ezläp yörergä turı kilde.

Tamaşaçı fikerençä, menä nindilär alar.

Teatr bik siräk kilä, şunlıqtan teatrdan bizgänbez.

Tatar telen añlap utıruçı tamaşaçı az bezdä, yäş buın bötenläy dä ana telen belmi, diärgä bula.

Üzebezneñ teatr bulmağanğa, xalıq mondıy tamaşanıñ tämen belmi.

Televizor xalıqnı milli sänğät'tän bizderde.

Reklama naçar, qayçaqta işetmi dä qalabız.

Oyıştıru ostalığı citmi. Xalıq ber-berse aşa teatrğa öndäsä, kübräk tä yöri başlar ide.

Konsertlarda telen añlamasa da, zamança dip atalğan cırlarnıñ köylären tıñlarğa kilälär, ä teatrda tel belü kiräk.

Tamaşaçı fikerlären Ayrat İbrahim tupladı. Sember.

XS
SM
MD
LG