Accessibility links

җомга, 9 декабрь 2016, Казан вакыты 18:43

Yekaterinburda ğärip qız cırdan räsem yasıy


Yekaterinburg şähärendä unikal' sälätkä iä bulğan tatar qızı yäşi. Utız yäşlek İrina Şakircanova yazmış tarafınnan räncetelgän keşe, tuğanda uq Dawın sindromı belän tuğan, şunlıqtan, aña başqa balalar kebek yäşäw, belem alu mömkin bulmağan. İrinanıñ änise Tänzilä xanım, bik yäşli irsez qalıp, berdänber qızın ber yalğızı üstergän. Yazmışına buysınıp, awırlıqlarğa çıdap yäşägän bu xanım üze dä qan basımı çire belän integep, 2нче gruppa invalid bulğan. Tänzilä xanım iskä aluınça, berwaqıt İrina änisenä pianino satıp alu üteneçe belän möräcäğät itkän. Bernindi muzıykal beleme bulmağan, yun'läp söyläşä dä almağan qızınıñ bu sorawına bik ğäcäplängän ana, bar köçen cıyıp, berdänbereneñ üteneçen ütärgä bulğan. Öydä pianino barlıqqa kilgän. İrinanıñ pianino aldına nota kitabı urınına kartina quyıp uynıy başlawı ananı tağın da ğäcäpkä qaldırğan.

Aylı kiçtä dulqınlanğan kül buyında yalğızı ğına moñsulanıp uyğa batqan qayın räsemenä qarap tuğan muzıka uylandıra da, sağışlandıra da, yarsıtıp ta ala. Çınlap ta, İrina, tabiğät küreneşläre surätlängän kartinalarğa qarap, üzeneñ tä'sirlären moñ aşa citkerä ala torğan iskitkeç sälätkä iä keşe. Qar yawuın da, qoyaş yaqtırtuın da, dulqınnar qağuın da, sarı qayın moñsulığın da muzıka aşa citkerä ul yöräklärgä.

İnvalid qıznıñ ğädäti bulmağan säläte tiz arada xalıqqa bilgele buldı. Tänzilä xanım söyläwençä, 1999нчы yılda, qız uynıy başlağannan soñ, televideniedän İrina turında tapşıru çıqqan. Annan soñ muzıkant qıznı Mäskäwdäge xalıqara konkurslarğa çaqırğannar, ul konkurslarda anı tıñlağan belgeçlär İrina Şakircanovanıñ sälätenä yuğarı baya birgännär.

Mäskäwdä uzdırıla torğan Filantrop xalıqara konkurslarına İrina Mansur qızı ike märtäbä – 2000 häm 2002нче yıllarda barğan. İkesendä dä zur uñış qazanıp, törle däräcädäge sertifikatlar alıp qaytqan.

Yekaterinburg şähäreneñ Kirov rayonı invalidlar cämğiäte uzdırğan barlıq çaralarda da anıñ çığışların köçle alqışlar belän qarşı alalar. Küptän tügel İrina Şakircanovanıñ benefis konsertı uzdırıldı. Zalğa cıyılğan 500ләп keşe öçen tılsımlı kiçä buldı älege konsert. Avtor başqaruındağı küñellärne irkäli torğan muzıkanı xalıq bik yaratıp qabul itte.

Äni keşe qızınıñ muzıykal' al'bomın yazdıru turında xıyallana. Ämma ike invalid ğömer itkän ğailädä andıy aqça yuq. Tänzilä xanım igelekle tatar yegetläre yärdäm itmäs mikän dip ömetlänä.

Taş qalanıñ taş öyendä, taş diwarlarğa elengän räsemnär cırı yazmış tarafınnan räncetelgän qız balanıñ citez, yögerek barmaqları astınnan urğılıp çığıp, küñellärgä cılı birä, yomşarta. İrina Şakircanovanıñ säläten üstererdäy igelekle köçlär tabılır dip ışanası kilä.

Fäwiä Safiullina, Yekaterinburg

XS
SM
MD
LG