Accessibility links

җомга, 9 декабрь 2016, Казан вакыты 03:17

İrannı BMO İminlek Şurasına tapşırdılar


Irannıñ atom programması tiräsendäge kierenkelek menä inde berniçä yıl däwam itä.

Bügen BMOnıñ Venada urnaşqan Xalıqara Atom Energiäse İdaräse İrannıñ atom eşçänlege mäsäläsen İminlek Şurası köntärtibenä quyunı xuplap tawış birde, yağni idarädäge daimi 35 il wäkilläreneñ küpçelege monı xupladı. Britaniä diplomatı Peter Jenkins, bu adım İranğa basımnı tağın da arttıraçaq, dip belderde:

"Älege ğämäl belän İslam cömhüriäte İranda ğinwar ayınnan birle barğan tärräqiätkä borçılu belderelä, şulay uq İrannıñ atom eşçänlegenä ışanıç bulmawın kürsätä."

Bügenge tawış birü İran tiräsendäge nizaqta yaña tärräqiät bulıp tora. Könbatış küptän inde Tährannıñ atom qoralı citeşterep yatu ixtimalına borçılu belderep kilä. İran isä, qoral tügel, ä energiä çığanağı buldırunı täqrarlap kilsä dä, Tährannıñ, uran bayıtunı yañartırğa cıyınuı turındağı soñğı xäbärläre borçılu tudırdı.

Bügenge tawış birü – İminlek Şurasında İranğa qarata xalıqara çikläwlär kertügä yul aça. Ämma İranğa qarşı ber nindi dä çaralar kimendä äle 1 ay kürelä almıy, bu tawış birü waqıtında – Rusiä häm Qıtay quyğan şart ide.

İran yağı bügenge xällärgä şunda uq kisken cawap qaytardı. Tähran, qoral citeşterü öçen uran bayıta başlawın häm üzeneñ atom qorılmaların tikşerülär öçen yabuın belderde. İrannıñ atom idaräsendäge baş wäkile urınbasarı Jawad Vaidi:

"İran İslam Cömhüriäte İminlek Şurasına tapşırılu turındağı qarardan soñ kiçekmästän, 2005nçe yılda parlament tarafınnan ber tawıştan qabul i telgän – tikşerügä röxsät birü turındağı qanunnı kiçekterergä mäcbür."

Xalıqara Atom İdaräseneñ bügenge qararına qaramastan, könbatış, Tährannıñ äle dä üzenä qarşı çaralarnı buldırmıy qalu mömkinlege bar, di. Martqa qädär diplomatiägä waqıt bar, häm Britaniä İrannı mondıy forsattan faydalanırğa çaqırdı. Tışqı eşlär ministrı Jack Straw, İrannı uran bayıtu eşçänlegen tuqtatırğa çaqırdı. Yuq isä – İminlek Şurasınıñ İranğa qarşı çikläwlär kertmi başqa çarası yuq, dide Straw.

alsu qormaş
XS
SM
MD
LG