Accessibility links

шимбә, 3 декабрь 2016, Казан вакыты 22:57

Möxämmät päyğämbär räsemnärenä qarşılıq däwam itä


Möselman dönyasında Möxämmät päyğämbärne kimsetkän räsemnärneñ matbuğatta çığuına protest belderü däwam itä. Äfğanstanda, könçığıştağı Lağman vilayäte başqalası Mihtarlamda uram cıyınında qatnaşuçılar polisiägä taşlar ata başlağaç, polisiä xalıqqa ut açqan, näticädä 4 keşe häläk bulğan, küplär yaralanğan, cärähätlär aluçılar arasında polisiä wäkilläre dä bar dip xäbär itelä. Qabulda qarşılıq belderüçelär Daniä, Britaniä, Fransiä ilçeleklärenä taşlar attı. Möselman dönyasında Daniä tawarlarına baykott uzğan atnada uq iğlan itelgän ide. Bügen bu şawqımğa Tatarstandağı "Edelweiss" säwdä çeltäre dä quşılğan. Bağdadnıñ könyaqkönçığışında protest belderüçelär, karrikaturlar çıqqan illär belän diplomatik häm iqtisadi mönäsäbätlärne özergä çaqırıp şiğärlär qıçqırdı. İran başqalası Tähranda şulay uq Avstriä ilçelegenä taşlar häm benzin şeşäläre atıldı. Binağa ut qapmağan, dip xäbär itelä. Avstriä xäzerge waqıtta Yevropa Berlegeneñ räise bulıp tora. AQŞ, Yevropa Berlege illäre häm BMO general sekretare Kofi Annan, köç qullanunı kisken täñqitläp çıqtı. Dubaiğa bulğan säfäre waqıtında, Annan, möselmannarnı, könbatışnıñ ğafu ütenüen qabul itergä çaqırdı. Berlinda, tışqı eşlär ministrı Frank-Walter Steinmeier, Germaniä, wazğiätne tınıçlandıru öçen üzeneñ ğäräp illärendäge bäyläneşlärennän faydalanırğa cıyına, dip belderde.

XS
SM
MD
LG