Qazan säwdägärläre dä dönyada qarşılıqlı waqiğalar barğanda, qaraşların belderergä buldı. Tatarstanda, Suriädäge kebek uram cıyınnarı häm ut törtülär yuq, ämma säyäsi fiker belderüçelär buldı. Möselman xatın-qızlar oyışması räise Almira Adiyatullina, bu räsemnärne möselmannarğa qarşı yunälgän dip belderep, çığış yasağan ide. Xökümät qarşındağı din eşläre şurası räise Rinat Nabiev, andıy temalarğa icat itkändä saq bulırğa kiräk, dip äytte. Möselman jurnalistlar berlege, andıy räsemnär bastırğan gäzit möxärrirlären eştän quarğa, digän belderü taratqan ide. Söyläşülär buldı, ämma, qayber möselman illäre başlağan Daniä tovarlarına boykot, baş tartu çarasına qädär barıp citmägän ide äle. Qazan kibetläreneñ kübesendä säwdä ğädäti tärtiptä bara. «Bäxetle» kebek zur säwdä şirkätendä Daniä tovarların satudan baş tartmıylar. Härxäldä, şirkättä ber nindi çikläwlär turında belmilär.
«Ramstor» kibetlärendä, Daniä tovarların älegä satıp almıylar, ämma şirkät citäkçelege bu xaqta räsmi beldermäde äle. «Edelweys» törkeme kibetlärendä, düşämbe könne, «Bez Daniä tovarların satmıybız», digän belderülär päyda buldı. Şirkättä bu xaqta räsmi belderü yasarğa tabılmadı. Bu mäs’älädä, barı Ayrat Xäyrullin üze añlatmalar birer dip aña möräcäğät itärgä kiñäş ittelär. «Qızıl Şärıq» «Edelweys» törkeme häm başqa şirkätlär belän idärä itüçe häm Duma deputatı Ayrat Xayrullin bezneñ belän bügen aralaşırğa waqıt tapmadı.
Daniä eşläp çığarğan tovarlar arasında, şokoladlar, balalar öçen känfitlär, sır, «Lego» balalar cıyu, tözü uyınçığı häm başqa äyberlär bar.
Bikä Timerova
