Şuşı könnärdä Qazannıñ “Basket-Xoll” sport sarayında Rusiäneñ 15nçe tennis turnirı bara. Bu turnir Qazan Kremle kubogı öçen uzdırıla. "Zur tübätäy" dip atalğan kubok öçen VIP, yäğni yuğarı däräcäle şäxeslär çaqırılğan. Bu Rusiä däräcäsendäge turnirğa Qazanğa 120 gä yaqın tanılğan sportçı cıyıla. "Bu ike atna eçendä Basket-Xollğa kilgän tamaşaçı kierenke köräşneñ şahitları bulaçaq"- dide Tatarstan premier-ministrı Röstäm Miñnexanov, turnirnı açu tantanasında. 4 fevral şimbä könne "Zur tübätäy 2006" dip isemlängän VIP turnirı tämamlandı. Kisken räweştä barğan köräştä berençe urınğa Rusiä tennis Federatsiäse vitse- prezidentı Vladimir Lazarev belän Mordoviä tennis federatsiäse prezidentı Nikolay Kaliniçenko layıq buldılar. Alar parlı uyında Yäşel Üzännän Zahidullin belän Morskovnı ciñdelär häm “Zur tübätäy” kubogın yawladılar. Şul uq könne xatın-qızlar arasında barğan yarışta Qazan Kremle kubogın Tambovtan kilgän Arina Rodionova yawladı. Ul mäskäwle İrina Bulıkinanı ciñde. İr-atlar arasında köräş 5 fevraldä başlandı häm yakşämbegä qädär däwam itäçäk. Turnir turında başqarma citäkçe Rämziä Nurieva Azatlıqqa bolay dip belderde: “Büläkläw öçen bilgelängän aqça 10 meñ dollar, bu aqçanı bez 3 оyışma bergä tababız: Tatarstannıñ Sport ministrlığı, Qazan şähäreneñ cirle oyışması häm Rusiäneñ Tennis Federatsiäse. Rusiäneñ törle töbäklärennän barısı 32 keşe qatnaşa. Mäskäwdä “Zur eşläpä” bülägenä uyın oyıştırıldı, ä bezdä "Zur tübätäy”gä yarış bardı. Şamil Tarpişçev turnirda qatnaşıp, Mäskäwdä eşläpäne yaulawı turında bezgä şıltıratıp belderde. 5 fevraldän tağın ir-atlar uyınına 64 keşe kiläçäk” dide ul. Rämziä xanımnıñ ulı, Ramazan çempion bulırğa xıyallana, ä anıñ qızı Daniä bu turnirnıñ baş särkätibe.
Mälikä Basıyr
Mälikä Basıyr
