Accessibility links

шимбә, 10 декабрь 2016, Казан вакыты 17:56

“Altın qalam” cäygä qädär tutıqmasmı?


Respublikanıñ mäktäp-gimnaziälärendäge 11 sıynıf uquçıları kiläçäktä qaysı uqu yortına kerergä, nindi professiä saylarğa dip baş wata başladılar. Qayberläreneñ jurnalist bulasıları, häm KDU nıñ jurnalistika fakul'tetına keräseläre kilä. Qullarına qäläm totıp yazmalar icat itüçe yäşlärgä yıl sayın ütüçe “Altın qäläm ” yäş jurnalistlar bäygese festivale KDUğa kerergä mömkinçelek birä. Şuşı könnärdä jurnalistlar yortında festival'ne açıq dip iğlan ittelär. KDU nıñ jurnalistqa fakul'tetı dekanı Wasil Ğarifullin bu xaqta bolay dip belderde: - Älege konferensiädä “Altın qäläm” bäygesenä start birelde. Şunıñ nigezendä respublikanıñ törle töbäklärendä yäş qäläm iälären barlaw, yazmaların tikşerü, saylap alu eşläre başlana. Min ışanam älege bäygedä qatnaşuçı yäşlär bezneñ fakul'tetnıñ Çallıdağı filialın, şulay uq Qazandağısın äylänep ütmäslär. Kiläçäktä professional jurnalistlar bulırlar dip ışanam. Şähär, rayon cirlärendä gazetalarda yazmalar yazıp cenlänüçe, televidenie-radiolarda syujetlar eşläwçe yäş qäläm iäläre “Altın qäläm” gä materialların tuplıy başlasalar da bula. Ul icatlarğa jyuri baya biräçäk. Saylanıp alınğan yäş qälämçelär bäygeneñ yomğaqlaw öleşenä, cäyneñ berençe ayında “Boris Polevoy” teploxodı belän ber atnalıq säyäxätkä çığalar. Säyäxät barışında iñ aktiv icatçılarğa, büläklär, “Gran-pri”lar birelä. Bäygedä “Gran-pri”nı rusça yazuçı yäş qäläm iälärenä 2 ne, ä tatarlarğa 1 ne genä birälär. Ä bolay ruslarğa 1не, tatarlarğa 1 biräbez di oyıştıruçılar. Şunsı qızğanıç, rusça yazuçı yäş qäläm iäläre tatarlarğa qarağanda kübräk uñışqa ireşälär. Çönki festival'neñ alıp baruçıları, oyıştıruçıları rus telen yaqın kürälär dip äytä anda qatnaşqan tatar yäşläre. Bıyılğı bäygedä qatnaşuçı yäşlär icatların mädäniät häm sänğät ölkäsenä yunältergä tieşlär. 2006 yıl mädäniät, sänğät yılı bulu säbäple bez dä festival'neñ temasın şuşı ölkägä bağışlarğa buldıq di oyıştıruçılar. “Altın qäläm” bäygese yäşlär häm sport ministrlığı, jurnalistlar berlege, KDU nıñ jurnalistika häm sotsiologiä fakul'tetı yärdäme belän oyıştırıla. Şuña da bäygeneñ açılış utırışında 2003 yılda bäygedä qatnaşıp diplom alğan, xäzerge waqıtta “Şähri Qazan” gäcite jurnalistı bulğan Güzäl Zıyätdinovanıñ fikere bolayraq buldı: - “Altın qäläm” yäş jurnalistlarğa üz-üzenä ışanırğa yärdäm itä. Kiläçägen jurnalistika kürgän keşegä ömet birä. Min üzemne mäsälän jurnalistikadan başqa kiläçägemne küz aldına kiterä almıym. Oyıştıruçılar äytüençä, moña qädär “Altın qäläm”dä ciñü ayulağan yäş jurnalistlar çın jurnalistlar bulıp ölgergännär diärlek. Bıyılğısı yılda tatar yäşlärenä iğtibar tieşle däräcädä birelerme, şul uq tatarça yazuçı, söyläwçe yäş qälämçelär artıq oyalçanlıqların qırıyğa quyıp üzlären kürsätä alırlarmı? Bu sorawlarğa cawapnı cäyen belerbez. Röstäm İsxaqi

XS
SM
MD
LG