Belarusnıñ däwlät iminlek komitetı KGB Minskidağı Polşa ilçelegen küzläw eşläre belän şöğellänüdä ğäyepläde. Däwlät televideniäseneñ Bel-1 kanalında çığış yasap KGBnıñ ber ofiserı, Polşa ilçelege – çit il küzläw xezmäteneñ başfatirına äylände, dip belderde. Şul uq tapşıruda iminlek komitetınıñ matbuğat wäkile Valery Nadtaçayev, çit il şpionnarı Belarusta saylawlarğa äzerlek barışında üz eşçänlegen tağın da canlandırdı, dip belderde. Polşa ilçelege räsmiläre bu ğäyepläwlärne kire qağıp, Belarus Polşa häm başqa könbatış illärne doşman itep kürergä teli, dip xäbär itte. 19nçı martta ütäçäk saylawlarda xäzerge prezident Alyaksandr Lukaşenka öçençe möddätkä saylanırğa tırışaçaq.
Bügen prezident belaruslarnı kimendä 3 bala tabırğa çaqırdı. Belarus cire zur, ä ildä barı tik 10 million keşe sanı bar, dide Lukaşenka. Belarusnıñ 30 million keşene aşatırğa mömkinlege bar, dip prezident, 3 häm annan da kübräk balaları ğailälärgä xökümät yardäm tabırğa tieş, dide.
