Accessibility links

якшәмбе, 11 декабрь 2016, Казан вакыты 15:02

“Татарские новости” – 2006 yılnıñ 2 sanına küzätü


Rusiä Federatsiäse tatarları öçen Mäskäwdä çığa torğan “Татарские новости” gazetasınıñ soñğı sanı dönya kürde. Aylıq säyäsi häm ictimaği mädäni- mäğrifäti “Татарские новости” gazetasınıñ aylıq tirajı 52 meñ danä bulıp basıla, Rusiäneñ tatarlar yäşi torğan barlıq töbäklärenä dä barıp citä dip äytälär redaksiädä. Gazeta ayğa ber genä märtäbä genä çıqsa da, anıñ yazmaları aktual''legen yuğaltmıy. Qağidä bularaq gazetada basılğan iñ qızıqlı yazma geroyınıñ fotoräseme gazetanıñ tışlığında basıla. Bu sanda ğäzitnen tışlığında Rusiäneñ ğädättän tış xällär ministrlıysında aviatsiä bülegen citäklägän general leytenant Rafail Zakirov fotoräseme birelgän. Anıñ turında yazma häm Rafail Zakirov belän äñgämä “MÇSnıñ talmas qanatları” dip atala. Rafail Şäkür ulı Zakirov Qazanda tuğan. Sızran''da xärbi oçuçılar äzerläwçe uçilişçenı tämamlağan. MÇSın aviatsiä bulegen oyıştıruçılarnıñ berse. Rafail Zakirovqa birelgän, millätegez tatar bulğan öçen eşegezdä awırlıqlar kürergä turı kilmädeme digän sorawğa Rafail Zakirov:

“Min üzem berqayçan da keşene millätenä qarap ayırğanım bulmadı, ä menä berwaqıt bezneñ citäkçe bulğan general Vitaliy Pavlov beznen millät keşelären ayırıp alıp, tatarlar duslıqta da xezmättä dä ışanıçlı keşelär dip äytä torğan ide.Şulay da Germaniädä xezmättä waqıtta tiskäre xälgä dä oçrağanım buldı. Biş boralaq polkınıñ ikese belän tatarlar citäkçelek itä ide İnde 3 nçe polkka yaña citäkçe itep, qazanışları öçen tağın tatar yegeten täqdim ittelär”.

Menä şul waqıtta Hawa köçläreneñ säyäsi idarä citäkçese: “Sez närsä! Germaniädäge biş polknıñ 3 se belän tatarlar citäkçelek itüne telisezme!” dip qarşı çıqqan. Läkin ul qarşı buluğa qaramastan tatar yegete Möxämmätcanovnı bilgelägännär citäkçe itep. Tik ozaq eşlärgä mömkinlek birmädelär di, Rafail Zakirov, anı tiz arada yuğarıraq urınğa küçerdelär

Şulay itep, “Татарские новости” gazetasınıñ ikençe sanınıñ 4 bitendä Rafail Zakirov belän bik qızıqlı äñgämä uqi alasız. Häm anda Rafail Zakirovnıñ eşenä, tormışına qağılğan küp törle fotoräsemnär dä urnaştırılğan. Gazetanıñ ikençe häm öçençe bitlärendä räsmi xäbärlär yañalıqlar belen tanışırğa bula. Gazeta akademik Kamil Valeevnı 75 yäşlek yubiley belän qotlağan. Häm mikroelektronikada eşläwçe, sovet kompyuterların uylap tabuçı Kamil Valeevnı yubileyı belän Rusiä prezidentı Vladimir Putin da qotlağan dip xäbär itä gazeta. Gazetanıñ bişençe bitendä Musa Cälilneñ yubileena bağışlanğan iğlannar häm yazmalar urın alğan. “Татарские новости” gazetasınıñ 6 nçı häm 7 nçe bitläre tulısı belän “Bez möselmannar” digän baş astında birelgän. Anda cämiğ mäçete tözeleşe häm xac säfäre xaqında da yazmalar bar. Şul yazmalarnıñ berse “Yöz yıl elek xacğa niçek barğannar” dip atala. 8 nçe bittäge yazmada Peterburg tatarları tormışı belän tanışa alasız. Anda Peterburgtağı Tatarstannıñ wäkälätle wäkile Şamil Äxmätşin belän äñgämä dä basılğan. 9 bittäge mäqälälär Rusiä töbäklärendäge tormışnı yaqtırtqan. Biredä Tгbıl, Ästerxan, Mäskäw yañalıqları belän tanışa alabız. Gazetanıñ 10 bitendäge ber mäkälä “Ufada şäxsi tatar gimnaziäse bulaçaq” dip atala. Mäkälä avtorı Rimma Bikmöxämätova Rawil Bignov belän bulğan äñgämäsen dä täqdim itä. 11 bittäge yazma tulısı belän äle genä Mäskäwdä uzğan Ğäliäskär Kamal teatrınıñ gastrol''läre turında söyli. Biredä gazetanıñ baş redaktorı İl''yas Möslimovnıñ teatr direktorı Şamil Zakirov häm dramaturg Tufan Minnullin belän bulğan äñgämäse basılğan. “Татарские новости” gametasınıñ 12 bitendä urın alğan yazma bezne ör yaña rubrika belän tanıştıra. Kiem dizaynerı Röstäm İsxakov belän bulğan äñgämä “Minem maqsat keşeneñ maturlığın kürsätü” dip atala. Biredä süz moda turında. Tatarstannan çıqqan kiem ürnäkläre uylap tabuçı Röstäm İsxakov üzeneñ plannarı belän urtaqlaşa. 14 bittä rässam Räşit Safiullin häm anıñ eşläre belän tanışırğa bula. Gölnaz Xäyrullina äzerlägän ul yazma – “Rässam dönyanı tıñlıy” dip atala. Räşit Safiullin Bögelmädä tuğan, Älmättä yäşägän, Qazanda uqığan. Ul küp törle kino filmnarda, tanılğan teatrlarda rässam bulıp eşlägän. İñ zur eşläreneñ berse dip, Tarkovskiy töşergän “ Stalker” tasmasın atarğa bula. Gazetanıñ 15 bitendä tanılğan futbolçı Rinat Bilyaletdinov belän äñgämä basılğan. Rinat üzeneñ ğailäse häm sporttağı uñışları turında söyli. Gazetanıñ soñğı bitendä, ğädättägeçä, iğlannar häm reklamalar. Alar da Mäskäwdäge tatar tormışın häm tatarlar belän bäyle bulğan qızıqlı eşlär turında söyli.

Näzifä Kärimova

XS
SM
MD
LG