Accessibility links

җомга, 9 декабрь 2016, Казан вакыты 01:06

Sabaqtaşlar oçraşuı yäki tuğan telgä bitaraflıq


Bu könnärdä mäktäplär görläp tordı. Çönki uquçılar belän bergä mäktäpkä yalğa qaytqan studentlar da ağıldı. Bu könnärdä studentlar, mäktäpne distä yıllar elek tämamlağan elekke uquçılar da üz mäktäpläre, uqıtuçıları belän oçraştı. Balaçaq uzğan mäktäpneñ moxiten tağın ber qat toyu, uqıtuçılar birgän iñ berençe sabaqlarnı, xıyallar tulı mäktäp yılların iskä alu küñelle, moñsu da. Qazanda ber sıynıfta uqığan Gölnaz belän Alisä mäktäpne onıtmıy. Sıynıftaşları belän oçraşıp, xäbärläşep toralar. Döres, alar mäktäpne küptän tügel genä tämamlağan, ämma mäktäp yıllarınnan qalğan duslıq alar arasında waqıt belän köçäyä genä bara. Alisä häm Gölnaz söyli

Mäktäpne uzğan yılda tämamladıq. Yartı yıl uzdı, bez äle haman da bergä. Ber universitetta da uqıybız bit. Sıynıftaşlarnı onıtırğa yaramıy. Bez dä oçraşıp torabız, mäktäpkä barıp qaytabız. Bik sağındıra mäktäp dusları. Bigräk tä berençe waqıtlarda. Yaña kollektivqa kerep kitü awırraq buldı. Näq şul waqıtta sabaqtaşlarnı tağın da nığraq sağına başlıysıñ. Şuña kürä klasstaşlarnı onıtmıybız, daimi räweştä şaltıratışıp, xäbärläşep torabız. Ä fevral' axırında barıbız da oçraşırğa cıyınabız.

Sabaqtaşlar oçraşuı tatarlar yäşägän töbäklärdä, awıl-rayonnarında da uzdı. Tatar mäktäben tämamlağan uquçılar awıllarına milli canlı, tatar bulıp qaytamı? Başqortstannıñ ber tatar awılında sağınıp qaytqan millättäşlär klasstaşların küpme genä ezläsä dä, ällä ni taba almağan. Kübese qayta almağan, eş, ğailä, tormış mäşäqätläre. Qayçandır ber sıynıf, ber ğailä bulıp yäşäsälär dä, bügen härkemneñ üz tormışı.

Oçraşuğa kilgän sabaqtaşlar mäktäpne sağınuları turında, belem birgän möğallimälärenä räxmätlären äytte. Kemder, mömkinlek bulsa, tormışnı yaña, çista bittän başlarğa, mäktäp, ğömer suqmağın tağın ber qat ütärgä teläge barlığın citkerde. Mäktäp belän oçraşudan tuğan xislär, tä'sirlär belän olığayğan uquçılar tuğan teldä büleşsä, kiçäge uquçılar şähärdän rus telle bulıp qayttı. Häm şunısı ğäcäp tatar awılında tatar mäktäpne tämamlağan uquçılar belän oçraşu rus telendä bardı. Milli cırlar, biyüllär dä anda siräk küreneş ide. Gärçä kiçädä fäqät yaqtaşlar, tatarlar ğına cıyılıp, ber genä dä başqa millät wäkile bulmasa da. Şuña kürä bu kiçädä millät yazmışı turında söyläw beraz uñaysız toyıldı.

Al'bina Zäynulla

XS
SM
MD
LG