Accessibility links

җомга, 9 декабрь 2016, Казан вакыты 14:41

Matbuğatnıñ “Altın fondı”


9 nçı fevral'dä Rusiä däwlät kitapxanäseneñ konferensiälär zalında, Rusiä matbuğatında yaña traditsiä barlıqqa kilü turında iğlan ittelär. Biredä, uzğan yılğı 13 nçe matbuğat kürgäzmäse näticäläre nigezendä, Rusiä matbuğatınıñ altın fondına kergän matbuğat çaraların häm jurnalistlarnı büläkläw märäsime ütte. Häm mondıy çaralar här yılnı matbuğat kürgäzmäsennän soñ ütärgä tieş bulaçaq. Häm bu isemgä layıq bulğan basma yıl äylänäsendä altın fonğa kergänlekne kürsätä torğan bilge belän çığa ala. Bıyıl Rusiä matbuğatınıñ altın fondına 250 matbuğat çarası häm 1200 jurnalist kertelüe mäğlüm.Bu fondnı Rusiä matbuğatı kürgäzmäsen oyıştıru komitetı häm kitapxanälär kollektorı täqdim itkän. Şunısı da qızıqlı, Rusiä matbuğatınıñ altın fondına Tatarstan häm Başqortstan basmaları da kergän. Ayırıp alğanda Tatarstannan “Tatarstan”, “Qazan” jurnalları häm “Время деньги” gazetası. Ä inde Başqortstannan bu fondqa altı basma kertelgän. Alar arasında “Ağidel” , “Ällüki”, “Yäşlek”, “Деловой мир” jurnalları häm mari telendä çığa torğan “Çulman” isemendäge rayon gazetası da bar.

“Tatarstan” jurnalınıñ baş möxärrire Rifat Fattaxov bu büläkne äle küptän tügel genä üzeneñ yubileyın bilgeläp ütkän jurnal öçen zur waqiğa dip atadı. Şunıñ östenä redaksiädä eşläwçe tağın 5 jurnalist iseme dä Rusiä matbuğatınıñ altın fondına kertelüe xäbär itelde dide ul. Alar arasında küptän tügel genä wafat bulğan Qazan universitetınıñ jurnalistlar fakul'tetı dekanı Florid Äğzämov ta bar dide, Tatarstan jurnalınıñ baş möxärrire Rifat Fattaxov.

Bügen Rusiä matbuğatınıñ altın fondına kergän jurnalistlar belän Tatarstannıñ wäkälätle wäkile Nazif Mirixanov ta oçraşu ütkärde.

Äytkänemçä Rusiä matbuğatınıñ altın fondına başqort telendä çığa torğan “Ağidel” jurnalı da kertelgän. Anıñ baş möxärrire Ämir Äminovnıñ da käyefe kütärenke:

“Ağidel” jurnalı Rusiädä çığa torğan başqa qalın jurnallar belän tiñ jurnal. Bezneñ jurnalda başqort yazuçıları ğına tügel, rus häm çit il yazuçılarınıñ tärcemä äsärläre dä basıla. Bezneñ jurnalnıñ üz tarixı bar , ul inde 83 yıl buyı dönya kürä. Bezneñ jurnalnıñ Rusiä matbuğatınıñ altın fondına kertelüe bezneñ öçen zur şatlıq !” dide Ämir Äminov.

Yazmanı “Azatlıq” radiosı öçen Näzifä Kärimova äzerläde.

XS
SM
MD
LG